YouTube-ah Subsciber ngah ber a la ni mai ang em? 

Naupang kum 5 mi lek ni mahse a naupanna ngaihnepsak ngawt theih a ni lo. Esther Hnamte chuan Zirtawpni zan khan India Independence Day pualin ‘Jana Gana Mana’ music video a tichhuak a, mit khap kar loah viewer nuai khat a nei tling hem mai. A hla hi zan dar 8 velah upload niin, viewer nuai khat nei tling turin darkar khat tha bak a mamawh lo. 

National Anthem ‘Jana Gana Mana’ hi 75 India Independence Day puala buatsaih niin, 3 Assam Rifles ten an feat - video hlu tak a ni ngei ang. 

Esther-i a vul
Esther Hnamte hi thalai zingah chuan hre lo mang kan awm lo mai thei, kum lama naupang zawkte leh rual u deuh zawkte pawhin a hming hi chu kan bel tlang viau tawh mai thei. Kum naupangte ni mahse a talent ropui tak vangin Mizoram pawn thlengin hriat a hlawh a, a chanchin hi media lian tak takte pawhin an ngaihven mek. 

‘Maa Tujhe Salaam’ a sak hnu phei kha chuan ngaihventu a ngah leh zual a, India rama mi challang tak takte pawhin a video chungchang hi an tweet nasa hle a, YouTuber tak takin an react bawk. He a video mi maktaduai 9.5 zetin an en tawh a, Mizorama mihring cheng zat atang chhut phei chuan awihawm loh khawp hiala tam a ni. 

Estheri hian YouTube channel a nei a, subscriber pawh nuai li chuang a nei tawh. Mizo zingah chuan Chcha Varte hi mimal (mahni hminga channel nei) zingah chuan subscriber ngah ber (?) a ni a, 423k subscriber a nei. Hei hi Estheri hian a hnaih sawt hle a, 419k subscriber a nei tling tawh - Chcha Varte khum thei dinhmunah a ding mek.