(Paula lawng chhiatna leh Zoram Kristianna) - Lalhmingliani Pachuau Nimahsela tuizangkhauh pahnih intawhna hmunah kan lut hlauh va, lawng chu lei an suttir ta a; tichuan lawng hnar lam chu a tang ta tlat a, tihchet zawh lohvin a awm reng a, a mei lam erawh chu tuifawn a nasat avangin a kehsawm tan ta a. (Tirhkohte 27:41) Mizote hi Pathianin tuipui ral atanga lokal mingote hmangin Chanchin Tha min pe a. Kum 1994 khan Chanchin Tha thlen kum 100-na chu ram pumah lungrual takin Kohhran hrang hrangin kan lawm mup mup a nih kha. Kum 2014 kan hmang liam a, kan ram kristianna pawhin kum 120 hmel a lo hmu ta a, Mosia dam chen kum 120 chu kan lo chen ta reng mai. Khawngaihna Chanchin Tha, Thlarau chhandamna chuan kum 120 hmel a lo hmu ve ta a. Mahse kum 2014 a lo ni a, he khawngaihna Chanchin Tha-in kum 120-na a chuan kai meuh chuan lungrual taka Gospel Centenary kan lawm ang boruak a ni ta hauh lo mai! Kan rama Kohhran lian ber Presbytarian Kohhran chuan Chanchin Tha thlenni atan January ni 11 chu pawmpui thei ta lovin March ni 15 chu a puang ta a. A eng zawk tak chu dik ang maw? Chunglam rorel a ni tlat a, tu thiam loh mah a ni lo ve. A hmasain tun hi eng hun nge tih kan hriat a pawimawh a. Hruaitu ropui Mosia kha kum 120 a dam a, Kanaan ram an thlen dawn tepah ram a lan vek tawh tihah Pisgah tlang chhip velah a thi ta a ni. Israel faten Moab phairuamah Mosia chu ni 30 zet an sun a, chutah hruaitu thar Joshua Lalpan a pe a, Kanaan ram an lut ta a nih kha. Kum 2014 khan he khawngaihna Chanchin Tha hian kum 120 hmel a lo hmu ve chiah bawk a. Tunah chuan Jentailte khawngaihna Chanchin Tha chuan mual a liam ta mek a, Moab phairuama Mosia sunna hun kha Zoram hian kan thleng ta a ni. Hun inthlak lai hian mite an chi-aiin kal ngaihna hrelo leh mangang tak tak an awm thin a, mi tam tak an beidawng a ni. He khawngaihna Chanchin Tha hian min awm tlei tak tak thei tawh lova, Camping leh crusade lah chu na chhawkna ang lek a ni tawh a, kan tuihalna a tireh thei tawh lo a nih hi. A thlakna tur erawh kan la hmuchhuak chuang silo, tui lo ru deuh chung leh a rah chhuah tur pawh hre lawk deuh ruak chungin Camping kan buatsaih leh nge nge a, a thlakna la awm miau heklo le. Awle, kan thupuiah lut tawh ila, Paula lawng chhiat thu leh kan ram kristianna hian inlaichinna thuk tak a lo nei reng mai a. Paula kha mi tang dangte nen Rom khaw pana an kalna kawngah Eurakuilo thlipui in a nuai a, an lawng chuan inhumhimna tur kawng hrang hrangin a zawng a, an mangang takzet a ni. Tin, ni rei tak, ni pawh, arsi pawh a lang lo va, thlipui namenin min nuai lo va, nun reng kan beisei tawh lo (Tirhkohte 7:20) tih kan hmu a. Nimahsela Paula hnenah Pathian a inlar a, lawng chhunga chuangte chu tumah an boral dawn lova, LAWNG ERAWH CHU A BO DAWN A NI tiin. Tin, Adria tuifinriatah thliin lehlam lehlamah min len min len a, zan sawm leh zan li a tlin zan chuan, zan laiah emaw, lawng mite chuan khawii khawmual emaw thleng dawnin an inhria a; chutichuan tui thuk lam an teh a, hlam sawmhnih niin an hria a; tin, rei lo tean an teh leh a, hlam sawm leh hlam ngain an hria a. Tin, lawng mei lamah thirchakai pali an thlaka, chutilochuan lung chhe hmunah min len chhuak hlauh dah ang e, tih an hlau va; tin, khawvar hlan an nghakhlel hle mai a. (Tirhkohte 27:27-30) Tichuan zan sawm leh zan li a tlin zan chuan (14 number hi lo chhinchhiah ila) beiseina kawl a lo eng tan ta, khawi khawmual emaw thleng dawnin an inhria a, khawvar hun an nghakhlel hle a ni. A tuka ni a lo chhuah chuan khawi li tengsawl emaw tiaupho nei an hmu a, chutah chuan an lawng chu chhuahtir an tum a, mahse an beisei angin thil a kal tluang leh ta lo…. an lawng chu tuizangkhauh pahnih intawhna hmunah a lut ta hlauhva, an lawng chu humhim zo lovin a keh ta! Nimahsela tuizangkhauh pahnih intawhna hmunah kan lut hlauh va, lawng chu lei an suttir ta a; tichuan lawng hnar lam chu a tang ta tlat a, tihchet zawh lohvin a awm reng a, a mei lam erawh chu tuifawn a nasat avangin a kehsawm tan ta a. (Tirhkohte 27:41) Heta tuizangkhauh pahnih a tih hi kan rama Kohhran lian pahnih Presbyterian leh Baptist Kohhran te nen hian ka tehkhin a, he tuizangkhauh pahnih intawk hian Paula te lawng chu a tikeh ta a ni. Tichuan Sipai za hotu chuan tui hleuh thiam apiang tuifinriata zuangthlaa, khawmual lo kai hmasa tur leh, a then thing phek chungah te, a then lawng bungraw chungah te kai turin thu a pe a. Lawnga chuang zawng zawng an vaiin mi 276 chu him takin khawmual an kai vek a, an lawng erawh an humhim zo ta lo a ni. Paula lawng chhiat hun kha zan sawm leh zan li a tlin zanah a ni a, ni sawm pali lai chaw an nghei tawh bawk a, 14 number hi kan ram tan a pawimawh khawp mai. Kum 2014 khan Zoramah chuan tuizangkhauh pahnih Presbytarian leh Baptist Kohhran, tun hmaa serh leh sang intawm a, thukhat vuaa kal thin kha an insu ta a ni lawm ni? Tunge dik a, diklo zawk tih lampang erawh chhui a ngai lo, hunin a rawn keng tawh a, Mizote hi Pathian hnam thlan Israel hnam bo pakhat kan nih tlat avangin kan bo hlen loh nan Pathianin hetiang hian hna a rawn thawk ta a nih hi. Hriatna tura beng nei chuan hre mawlh rawh se. Sapho khan Jentailte tana Khawngaihna Chanchin Tha min hrilh a, kum 120 chhung chu Jentailte angin kan lo awm tawh a, Zoram kristiante hi Paula lawngah kan chuang a ni. Kan rama Pathian thu kan buaipui ber leh chhiar tam ber chu Tirhkoh Paula lehkhathawn 13 te hi a ni a, Thlarau chhandamna pianthar nan leh kan Thlarau nun chawm nan kan hmang a, a tha vek e, a hun mil zelin Pathian thu pawh kan her rem zel a ngai a ni. Tunah chuan kan chuanna lawng chu a keh ta si a, kan boral loh nan a theih ang anga khawmual lam kan pan a ngai ta a ni. Tui hleuh thiam a pawimawh hle mai. Tunah chuan tui hleuh thiam thenkhatten khawmual an thleng hmasa tawh a, midang lo la kai tur tam tak an la awm a, khawmual an kai theihna hmanrua zawn a ngai ta a ni. Thlarau chhandamna chauh ni tawh lovin tlanna famkim, taksa, rilru leh Thlarau tlanna famkimah Lalpan min hruai luh a tum ta a ni. Hmeichhe pahnih buh rawt sawmnaah chuan buh rawt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang. Matthaia 24:41 Hetah hian Thuthlung pahnih pakhat zawk kal bopui a, pakhat zawk hnutchhiah tur a rawn sawi a, chu chu Jentail Thuthlung leh Israel Thuthlung a ni. He Jentail khawngaihna Chanchin Tha hi lak bo tur zawk a nih avangin tunah hian a liam ta mek a ni. Pathian Lalramah kan luh a ngai ta a, bawhchhiat hma Eden huan nun kha Lalpan min pek leh a tum a ni. Lalisuan tawngtai dan min zirtir a, I LALRAM LO THLENG RAWH SE tiin nitin deuhthaw kan tawngtai thin. Mahse, he kan tawngtaina thu hi a awmzia kan ngaihtuah ngai em le? Lalisua khan he leiah hian a Lalna ram rawn din hi a tum ber pakhat a ni a. Tunah chuan kan duh emaw duh lo emaw Pathian Lalram chhungah kan luh a ngai tawh a ni, ramin Jordan a kan dawn e. Tun hmain hemi kawng hi in la zawh ngai silova (Joshua 3:4). Khawngaihna Chanchin Tha chu ui tak chungin vuiliam a ngai ta a. Jentail rama kan hausakna zawng zawng kha hlipthlain Pathian hmaah saruaka kan inlan a ngai a, Lalpan silhfen tharin min thuam tawh dawn zawk a ni. Hetah hian (Jentail ramah hian) khaw hmun nghet kan nei si lo va, khaw lo la awm tur (Pathian lal ram he khawvela ding tur) chu kan zawng zawk a ni. (Hebrai 13:14)