Zanin zanlai dar 12:30 hi football inpui an tih mai England leh football khawvel-a hming chungnung Italy ten Euro 2020 final an khel dawn. 

Football ram ropui anga hriat lar England hi tournament lianah an la champion meuh lova, Sir Alf Ramsey hova kum 1966-a world cup nomawi an chawi bak kha chhuan tur leh uanpui tur an nei hran lo. Zanina final khelhna tur khawvel stadium lar leh ropui ber pakhat Wembley Stadium-ah hian eng boruak nge thleng ang a, tunge chak zawk ang tih erawh sawi lawk thiam rual a ni lo mahse, English ho chuan champion ngei in ringin ‘Football’s coming home again’ tiin zai an vawr suau suau mai le!

Tu ram nge ropui zawk
    Tun Euro-a final lut team pahnih hi player nei tha ram an ni a, tournament tan hma hauh atanga champion thei tura rin kai an ni. Football ngaihsanna ram ve ve an nih piah lamah player an nei tha dun a, tournament tan tirh atangin an che tha dun nghal nen, group stage atangin team hneh loh nei lovin an la kal tluang a  final an thleng.

Final inpet thleng tura an kalkawngah pawh team tha tak tak an hneh chho dun a, England kawng hi pan deuh anga ngaih nimahse, an hmaah Germany leh Denmark meuh pawh lo tlu sawp tawh an nih vangin an vanneih vang tia dah hniam ngawt chi an ni lo. Tun tournament chhungin goal khat chiah an la chhuah a, an thawhhona a that piah lamah an squad a chhah tha tawk hle bawk. 

An tumpui tur Italy hi tun tournament mai nilovin tun hnaiah an che tha cho hle a, International match-ah game 33 chhung hneh loh tawng lova kal tluang mek tih hi hriat hmaih chi an ni awm love. Match 35 chak loh nei lova kal tluang record chelh lai Brazil leh Spain te umphak ngei an tum ruh hlein a rinawm. 

England pawh hi tun tournament-a che tha thut anni bik hauh lo, inelna hrang hrang match 12-a hneh loh nei lova kal tluang mek an ni a, match 12 khelha tum 11 chak, vawi 1 inhnehtawk record chelh lai an ni ve bawk. Tun Euro-ah hian match 6 khel tawhin chak loh an lanei lo. 

Tunhma lam chuan
    Ram pahnih te hi tournament lianah an la inhmachhawn tam lova, Euro 2012 khan quarter final-ah inhmachhawnin penalty shootout-ah England hi an tlawm a, 2014 World Cup group stage-ah Italy hi 2-1 in an chak nawn bawk. Zanin hian  Azzuri lamin chak nawn ngei an tumin a rinawm a, Three Lions lam hian tlawm nawn an tum loh piah lamah phuba lak ngei an tumin a rinawm.

Team pahnihte final zin kawng
    Italy hi Group A-ah awmin Turkey, Switzerland leh Wales te nen round sang zawk luh an inchuh a. An match hmasa berah Turkey tumin si thum faiin an hneh a, football thiam ram Switzerland pawh si thum fai bawkin an hneh leh thei. Group match hnuhnung berah round sang zawk an lut chiang tawh hriat hnuah Wales chu si khat faiin an hneh leh bawk. Second round-ah Austria tumin a vawi khat nan an lamah goal a lut ve a, mahse a tawpah dingchang zawkah tangin 2-1 in an hneh. Quarter leh semi final-ah phei chuan champion tura rinkai team pahnih Belgium leh Spain an hneh chhauh leh theih vangin dah hniam rual an ni ta lo.

Mahni khawpui ngeia final khel tur England hi Group D lamah Croatia, Scotland leh Czech Republic te nen an awm hova. 

Euro 2020-a an match hmasa berah Croatia si khat faiin an hneh a, goal thun lovin Scotland an inhnehtawkpui hnuah Czech Republic hneh lehin chiang takin group leader ni chungin round of 16 an lut. Gorup stage lamah beisei an phak lo chungin knockout round-ah erawh an danglam ta hle a, round of 16-ah team tha Germany chu 2-0 ngawtin an hneh nghal a, quarter final-ah phei chuan Ukraine si li faiin an hneh leh. Semi final-ah Denmark tumin an talbuai hman tep a, mahse a hun te-a rah thin an tih angin extra time-ah hnehna changin final an lut. 

Team innghahna te
Sawi tawh angin team hnih te hian player an nei tha dun hle a, mual chhunga an tal tawh dan enin tu team zawk zawk pawh hi chak se trophy chawi tura iaiawm an ni lo. 

Mual neitu England lam hian Premier League lama goal thun atchilh Harry Kane te, goal a vannei thei tak Raheem Sterling te, Chelsea-in Champions League an chawi theih nana player pawimawh Mason Mount te, khawvel defender manto ber Harry Maguire leh si ban nghak rinawm Jordan Pickford te leh inkhelh boruak thlak danglam thei khawp a tha player dang an kat nuk. 

Serie A lam kan en tam loh vangin Italian player lam hi Mizo te chuan kan hmelhriat tam vaklo maithei a, chutih rualin club ropui Juventus erawh kan hre ngeiin a rinawm. Chu club-a player rinrawl pahnih Giorgio Chiellini leh Federico Chiesa te team tana an pawhmawh zia chu tun Euro-ah kan hmuh mek hi. Anni pahnih bakah Insigne te, Jorginho te, Locatelli te leh Verratti te hi Spain leh Belgium mipui veltute kha an ni tlat a, zanin hian an thiam an theihnghilh thutin a rinawm loh. Anni bakah hian kum 16 mi chauh a nih laia AC Milan keeper ni thei Italy chhandamtu an tih mai Gianluigi Donnarumma ala awm cheu.