EURO 2020 official song

Admin - May 15, 2021

We Are the People

Thla thar mai hian football inelna ngaihhut EURO 2020 chu khelh a ni dawn a, tum dang ang bawkin official song an nei leh dawn. EURO 2020 official song tur hi 'We Are The People' tih a ni a, May 14, Zirtawpni khan tlangzarh a ni. 

'We Are The People' hi Dutch DJ lar Martin Garrix leh U2 duo Bono leh The Edge ten an sak a ni. Rimawi khawvela sulhnu nei tha tak takte irawm chhuak ni awm reng a mawi a ni - EURO khelh tan hma ngeiin football ngainatute tan chuan sak thiam ngei chi a ni. 

Khawvela DJ lar leh hriat hlawh berte zinga mi Martin Garrix hi kum 2019 October khan EURO 2020 official music artist atan ruat a nih thu Amsterdam-ah puan a ni a, 'We Are The People' hi a rawn phuah chhuak ta a ni. 

Kum 25 mi Martin Garrix chuan, "Bono leh The Edge te nena khawvela infiamna khawmpui lian berte zinga mi EURO 2020 official song kan tichhuak thei hi ka lawm a, a ropui tak zet a ni. Kan thawkho thei hi ka inchhuang a, nuam ka ti tak zet," tiin a sawi. 

EURO official song 'We Are The People' hi Martin Garrix YouTube channel-ah upload niin, mi maktaduai chuangin an view leh der tawh a ni. 

UEFA EURO 2020 hi June 11 khian Rome-ah kick off a ni ang. 

Share now