2021-2022 season chhunga UEFA Men’s Player of the Year atana Real Madrid leh France striker Karim Benzema thlan a ni a, hmeichhe lamah Barcelona leh Spain midfielder Alexia Putellas chu Player of the Year-ah thlan a ni bawk.

Nizan UEFA Champions League group stage draw neih tumah Europe-a player tha ber te hi puan an ni a, hemi rual hian lawmman chi hrang hrang sem chhuah nghal a ni.
 
Lawmman dawngtu Benzema hian season liam ta khan Real tan competition hrang hrangah game 46 a khel a, goal 44 zet a khung a ni. League ngaihhlut ber Champions League bikah ringawt pawh goal 15 zet khungin goal khung hnem ber a ni bawk. Lawmman dawng tur hian a team mate Thibaut Courtois leh Manchester City playmaker Kevin de Bruyne te a khum a ni.  

Hmeichhe lama he chawimawina dawngtu Barcelona team captain Putellas hian Arsenal leh England winger Beth Mead leh Germany leh Wolfsburg midfielder Lena Oberdorf te a khum thung a, Putellas hian season liamta khan Barca tan goal 34 zet a khung bawk.