Johns' Decor, Millennium Centre-in anmahni ruahman leh duhdan anga bag an siamchhuah 'Jute Bag' chu nimin khan Atrium, Millennium Centre, Aizawlah Esther Lalruatkimi, Secretary, Govt. of Mizoram chuan a tlangzarh. He Jute Bag hi style hrang hrang chi 7-ah siamchhuah a ni a, Rs.300/- atanga Rs.700/- inkar man niin, Aizawla hralhchhuah bakah Europe leh North America-ah thawnchhuah tum a ni bawk. Bag siam chhuaktu Johns' Decor chuan, tunlai khawvelah polythene hmang tlem zel tura inzirtirna leh a thlakna remchang a awm theih nana buatsaih an nih thu a sawi. Esther Lalruatkimi chuan environment humhalh zawnga hmalakna kalpuitu an lo pung chho zel chu lawmawm a tih thu a sawi bawk.