Aizawl; MNF Party-in kum 2013 MLA inthlana EVM 'a diklo' tia High Court-a an zualkona thu kal zelah Gauhati High Chief Justice, AM Sapre chuan, hemi chung-chang ngaihtuah tur hian Judge pahnih a ruat a, Zirtawpni khan an khin hriattirna hi mi hrang hrang hnenah a pechhuak bawk. Zalen palai thudawn danin, MNF MLA Candidate 23 te chuan January 23, 2014 khan Gauhati High Court-ah EVM chungchanga an lung-awilohna thu hi an thlen a, an thu thlenah chuan EVM chu tih danglam (temper) ni ngeia an hriat thu te, enquiry committee dina result enfiah leh an phut thu te, Election Commission of India leh Mizoram CEO (Chief Electoral Officer) te chu EVM uluk taka vawng a, vote tla te lo paih (delete) lo tura tihna leh an thil hmuhchhuah atangin, EVM a lo diklo ngei tih Court-ah finfiaha a khingtu lamin thiam an chang a nih chuan, a tling tawh sate chu tling lo-ah puangin a khingtu, a hmaa tlinga lo puan tawhte hnaih bertu (MNF candidate) te chu tlinga puan nise tiin Court-ah hian an thlen nia hriat a ni. MNF Party hian Congress candidate, Election Commission of India, Chief Electoral Officer (Mizoram) leh Returning Officer te an khing nia thudawn a ni.