DOWNLOAD OUR APP

Read latest news on your phone
app-store

FA Cup semi-final thlirna tawi

Jan 01, 1970

FA Cup semi-final thlirna tawi

    FA Cup semi-final hmasa zawk chu nizan khan Premier League hmahruaitu leh pahnihna Manchester City leh Liverpool ten an khel tawh a, anni club pahnih hi kar hmasa Pathianni khan Premier League-ah 2-2 in an lo inhnehtawk tawh bawk avangin  boruak an nei lian hle a. Inkhel hmuhnawm takah Liverpool hian 3-2 in Machester City hi an hneh a, FA Cup final an lut.

Sadio Mane chuan Liverpool tan goal hnih a khung a, Ibrahima Konate chuan goal khat a khung ve bawk. Manchester City tan hian Jack Grealish leh Bernardo Silva te chuan goal an khung. 

Zanin a khel tur Chelsea leh Crystal Palace te boruak pawh hi a hniam hran lo. Zanin hian Wembley Stadium-ah an khel ang. Semi-final hnuhnung zawkah hian London club pahnih Chelsea leh Crystal Palace te an inhmachhawn dawn a, FA Cup tum 8 zet champion tawh Chelsea hian tun tum chu champion an tumruh hlein a rinawm. Achhanchu kum zawna final lut siin nikum 2021 khan final-ah Leicester City  lakah an tlawm a, 2020 khan final-ah tho Arsenal an hneh lo leh bawk. 
   

Palace pawh hi 2016 hnua final luh theihna hun tha an hmuh lehna hmasa ber a nih vangin an phur hle turah ngai phawt ang. Pep Guardiola-a naute hi 2019 khan FA Cup-ah hian an champion a, knockout football competition upa ber FA Cup kum 150-naah hian champion chak hlein a rinawm a, mahse final-ah an hmel kan hmu dawn ta lo a ni.


 FA Cup semi-final-ah hian substitute 9 neih theih niin mi 5 a inthlak theih bawk ang. May ni 14-ah Wembley Stadium-ah final khelh a ni dawn a, tupawh lut se a hmuhnawm dawn tih a chiang.

 Thomas Tuchel leh a pawlte hian Fifa Club World Cup leh Uefa Super Cup an chawi tawh naa Carabao Cup final-ah Liverpool an hneh lo bakah League lamah City aiin point 12 zeta a hniam avangin trophy dang beisei tur an nei tawh lo. FA Cup chawi tura an kalkawng a awm Palace hi hneh ngei tumin an thawk chhuak ngei ang le. 

Share now