DOWNLOAD OUR APP

Read latest news on your phone
app-store

FACEBOOK LEH WHATSAPP HMAN DAN HIM LEH THA

Feb 15, 2015

FACEBOOK LEH WHATSAPP HMAN DAN HIM LEH THA

—  Joseph Lalchhuana IPS, SP, CID Crime, Mizoram Facebook leh WhatsApp hman dan him leh tha kan sawi dawn a Facebook leh WhatsApp hi Internet kaltlanga inbiakpawhna hmanrua a ni a, Facebook hi social networking site niin, WhatsApp hi Cross Platform Mobile Messaging Application a ni thung. Facebook/WhatsApp te hi thil tangkai tak a ni a, chutih rual chuan humsual thuk taka min hruailut theitu a ni. Internet khawvelah hian mi bum hmang te, rukru te, pawngsual chingte leh pawikhawih chingte an awm reng a. Heng mite hian mi bum nan te, mi tihbuai, vau, tih thaih, puh hmingchhiat, mipui tihchiai leh tithlabar thei zawnga thu belhchian dawl lo thehdarh nan te leh midang anga inchhala mi tihhmingchhiat emaw, an nihna a ruka hmansaka, pawikhawih nante an hmang thin a ni. FACEBOOK: Facebook company in a tarlan danah chuan September 2014 thleng khan khawvel pumah facebook hmangtu vaibelchhe 135 an awm a. India ram bikah chuan Facebook hmangtu vaibelchhe 10 chuang an awm bawk. Mizoramah pawh kum 2009 vel atang khan Facebook kan lo hmang ve tan a, tun thleng hian hmangtu kan la pung zel a ni. Rang leh awlsam taka inpawhna hmanrua tha tak a ni nain, hman sual avanga pawi lian tak khawih leh tuartu nihna, dan bawhchhiat avanga lung in tan leh pawisa tam tak chawi theihna a nih avangin facebook hmangtute chu kan fimkhur hle a ngai a ni. Midang lakah inven a tul rualin hetiang website a kan thu ziak leh thlalak dah te hi dan kalh a ni em tih kan chian thin fo a ngai. Facebook hmang tute tana hriat leh zawm tur pawimawh te chu heng te hi a ni:- 1. Privacy Setting hman tangkai a tha: Facebook-ah hian kan thlalak, video leh information dangte hi mi zawng zawng hmuh vek theih loh a, i rin ngam thian thate hmuh atan chauha privacy settings-a dah thin hi a tha ber a ni. He setting hi kan thiam lo a nih chuan a thiamte rawn mai tur a ni. 2. I chanchin kimchang reng reng social networking site-ah dah suh. Hei hi a chhan chu i chanchinah khan mi bum chingten bum i awlsamna lai an lo zawng ru reng thin a, chumi hmang chuan i sihhnipna point ah tak an rawn dekin bum nan che an rawn hmang ta thin a ni. Hetiang bumna avang hian Mizoramah pawh cheng nuai tam tak mi eng emaw zatin an chan tawh nghe nghe ania. 3. Mi i la hriat chian loh hnenah i chanchin kimchang hrilh suh. I mi hriatchian loh khan i chanchin atang khan bumna tur che a hriat theih dawn avangin bum let nan che a rawn hmang thei a ni. A bikin hmeichhe tleirawl fimkhur nachang la hre lote hian an chanchin kimchang tarlan an ching thin a, chu chu anmahni lo chang rengtu mi sualte tan anmahni bumna remchang a ni thei a ni. 4. I thlalak reng reng i zah lehna tur chu dah suh. Ruihtheih thil avang te leh phur thut vang tein kan thlalak mawi lote mi dang hmuh atan kan dah mai thin a, hei hi tih loh reng reng tur a ni. Midangin second khat lekah pawh an lo copy vek thei a, i delete hnu pawhin mi dang kuta a luh vek tawh hnu chuan tih reh leh theih a ni tawh lo. 5. I mi hriatchiante chauh lo chu friend-ah pawm suh ang che. Facebook-a friend ngah hi intihtheih nan mi thenkhatin an hmang a. An hriatchian lohte pawh thianah an nei hmiah hmiah a, chu chuan thil dik lo leh mualphona kawngah a hnuklut zawk. Sapte hi kan ngaisang a, chuvangin sap thian neihte kan châk a, sap anga inchhalin mi dang daihten an rawn biak pawh thin avangin, thian atan siam loh hi a him ber a, thian atan i siam a nih pawhin fimkhur la, thilpek leh duhsakna pek tum awma an rawn lan chuan rin loh tawp hi a him ber a ni. Hetiang hian mizo hmeichhiate bumin an awm nasa em em a, pawisa nuai tam tak inbumna avangin chan a ni tawh ania. 6. Mi dang chanchin tihmualphona lam tur chu dah loh a tha. Ninhlei nan pawh hman loh tur a ni tawp ma. Hetiang tih chin avang hian mizo thalai te zingah jail bang zut leh thubuai nei pawh an awm nual a ni. 7. Social networking-ah hian inbiaknel a awl hle a, mahse a taka inhmuh kher tum hi a tha ber lo, inhmuh dawn pawhin hmun ualau leh mi dang tel vea inhmuh a him. Pawngsualna pawh hetiang inbiak nelna kaltlang hian a thleng tawh a, chutiang case chu eng emaw zat Police a report loh pawh a awm ngei a rinawm. 8. I lan thatna ber thlalak i dah a, mi dangin an rawn fak che pawhin lawmna tur a awm chuang lo, a rawn faktu che khan tum nei ranin thil tha loah a hruailut thei che a nia. 9. I password thlak fo rawh. Password atan hian awlsam taka hriat mai theih tur hman loh a tha. A theih hram chuan hawrawp leh number inpawlh hman hi a tha a, i password chu nangmah chauhin hria la; tin, i password chu i thlak fo thin dawn nia. 10. I account vawnghim rawh. I facebook account chungchang zawhna Email, WhatsApp emaw SMS i dawn chuan uksak suh. Chutiang message rawn thawntu che chu misual an nih theih avangin i user Id leh password te hrilh suh. WHATSAPP: WhatsApp hmangtute tana hriat leh zawm turte chu hengte hi an ni: 1. Chhiatna lam, a bikin mithi ruang leh hliam thlalak thehdarh nan WhatsApp kan hmang nasa em em a, hei hi chhiat tawktu ten huatthu ah an lak chuan Dan bawhchhiatna, hrem theih a ni. Mi te rilru tina, tichiai leh tithlabar thei thlalak post loh a him ber. 2. Naupang kum tling lo an chetchhiatna leh an chanchin tha lo zawngte leh thlalak mawihnai lo theh darh hi dan kalh a ni. 3. Mizote hi fiamthu duh leh titi nuamti kan ni a, WhatsApp hi fiamthu uchuak thawh nan hman loh a him ber. 4. Facebook lam inbumna ang bawk hian WhatsApp-ah hian inbum theih a ni tih hrereng la, i mi hriatchian loh lakah fimkhur a tha. 5. Thlalak dukdak lo leh him lo leh zahmawh rawngkai thlalak thehdarh emaw, thawnchhuaktu nih hi sual a ni tih hria la, IT Act 2000 tlawhchhanin hrem theih a ni tih hriat a tha. 6. Mi thlalak emaw thuziak a i comment ringawt pawh hian thiam loh a chantir thei che tih hria la, fimkhur taka mi huat loh tur zawnga comment siam thin a tha. 7.?Dawt leh thu belhchian dawl lo thehdarh nan i hmang a nih chuan, dan anga hrem theih i ni tih hriat a pawimawh. 8. Mi dangte rilru tina thei leh mi huat tur awm chi chu Group-ah post ching lo la, hrilh duh bik i nei anih chuan Personal Chat ah thawn mai zawk thin rawh. 9. Smartphone tha tak kan nei a, keimahni pawh kan smart ve a tul a nia, a awmzia chu mi che chhe lai thlalak te, mi awm duhdah lai thlalakte leh mi lan that vak lohna thlalakte awlsam takin kan phone camera hmangin a lak zung zung theih tawh a, hengte hi WhatsApp hmanga thehdarh hi a tha kher lo. Huatthu a an la anih chuan dan bawhchhiatna leh hrem theih a ni. Facebook/WhatsApp, Email/SMS emaw electronic device hmanga inbiakna eng pawh hman sualte hi dan kalh (Cyber Crime), lung in tan leh pawisa tam tak chawi theihna thilsual a ni tih kan hriat a pawimawh hle a ni. SOCIAL MEDIA HMANSUAL HREM THEIHNA DAN TE: • Computer leh a kaihhnawih ang chi atang Message huatthlala leh in ral dehna thu thawnchhuah. Hremna: Kum thum thleng lungin tan leh fine. (IT Act, 66 A) • Mi identity ruksak (Password ruksak leh a dangte). Hremna: Kum thum thleng lungin tan leh cheng nuai khat thleng chawi tir theih. (IT Act, 66C) • Mi hming chhal a midang bum Hremna: Kum thum thleng lungin tan leh cheng nuai khat thleng chawi tir theih. (IT Act 66D) • A neitu phalna lova mi dangte zahmawh thlalak/video pho lan. Hremna: Kum thum thleng lungin tan emaw cheng nuai hnih thleng fine emaw a pahnih in. (IT Act, 66E) • Zamawh rawng kai lam chi thil theh darh. Hremna: Vawi khat tihsualnaah kum 2 atanga kum 3 lungin tan leh cheng nuai nga thleng chawi. Vawihnihna emaw a dawt leh zelah chuan kum nga thleng lungin tan emaw cheng nuai sawm thleng chawi emaw a pahnihin. (IT Act, 67) • Mipat hmeichhiatna emaw hetiang lam rawng kaia khawsa lai lem emaw thlalak theh darh. Hremna: Vawikhatna ah Kum nga thleng lung in tan leh cheng nuai sawm thleng chawi. A vawi hnihna emaw a leh pekah chuan kum sarih thleng lungin tan leh cheng nuai sawm thleng chawi. (IT Act, 67A) • Naupang kumtlinglo chanchin, saruak thlalak emaw zamawh rawngkai a, an inhnamhnawihna lampang ang chi reng reng download, fak maw, lak khawm, zawn, in thleng emaw theh darh. Hremna: Vawikhatna ah Kum nga thleng lung in tan leh cheng nuai sawm thleng chawi. A vawihnihna emaw a leh pek ah chuan kum sarih thleng lungin tan leh cheng nuai sawm thleng chawi (IT Act, 67B) • Social Media-a sakhaw dang deusawh leh sawichhiat. Hremna: Kum 3 thleng jail tan or/and pawisa chawitir (IPC Sec 153A). • Zahmawh rawngkai leh invauna (tualthah, pawngsual) kaihhnawih thawn darh. Hremna: Kum 7 thleng jail & pawisa chawi (IPC Sec 506, 507) Awle, a tawp nan chuan Computer leh mobile phone te hi thil tangkai leh nunphung tisamkhaitu an nih rualin, hman khawlohna erawh chuan lung in tan, pawisa tam tak chawi leh mite hmelmaa min siam theitu an nih avangin FIMKHUR hi mi tin tih tur a ni a, mi dangte pawh hrilh darh turin ka ngen a che u.
Share now