DOWNLOAD OUR APP

Read latest news on your phone
app-store

Fak Zai top 10 a chiang ta

May 15, 2022

Pentecost Fak Zai top 10 tihchian a ni ta - General PYD (Mizoram UPC) hnuaia Literature Committee leh Literature & Publication Board-in an buatsaih, Fak Zai inelnaa top 10 result chu nimin khan GPYD YouTube channel kaltlangin puanchhuah a ni. 

Pentecost Fak Zai top 10 tihchian a ni ta - General PYD (Mizoram UPC) hnuaia Literature Committee leh Literature & Publication Board-in an buatsaih, Fak Zai inelnaa top 10 result chu nimin khan GPYD YouTube channel kaltlangin puanchhuah a ni. 


Dinthar Kohhran Hall-a neih Fak Zai inelna hi online kaltlangin audition round neih a ni a, May 12 leh 13 zan khan top 20-ten music track hmangin intihsiakna an neih chhunzawm. Top 20-ah hian mi 22 tlingin, zan hnih an intihsiakna atangin a tha zual 10 chu thlanchhuah an ni leh ta a ni. 


Fak Zai chief judge Rev. Dr. Ngurthanpara Sailo chuan, "Top 20-a tling zaithiamte khan an thiam em em vek a, an zing atanga sawm thlanchhuah kha thil awlsam a ni lo. Intihsiakna a nih miau avangin a tling leh a tla an awm a ngai a, tling zo ta lote pawh Pathian faka zai chhunzawm zel turin ka ngen duh a ni," tiin Zalen a hrilh a, Fak Zai chu kohhran huang chhung chauh ni lo, Mizo mipuite zaia min awi thei tur zawnna a nih thu a sawi bawk. 


Top 10-a thlanchhuahte hian May 19, Ningani zan leh May 20, Zirtawpni zanah intihsiakna an nei leh dawn a, live music-in intihsiakna hi chhunzawm tur a ni tawh dawn - General PYD YouTube channel kaltlangin live-a en theih tura pekchhuah a ni ang a, zan dar 7:30-ah tan a ni ang. 


Fak Zai top 10 hi Zonet Bawhbelah en theih tura pekchhuah a ni dawn bawk a, May 21, Inrinni zan dar 8:00-ah zan khatna hi en theih tura pekchhuah tur niin, May 22, Pathianni zan dar 8:00-ah zan hnihna pekchhuah leh a ni dawn bawk a ni.


Grand Finale hi Dawrpui Multipurpose Centre-ah neih tur niin, May 27, Zirtawpni zan dar 8:00-ah tan a ni dawn a, Zonet Zawlbuk leh GPYD YouTube channel-ah live-a en theih tura pekchhuah a ni ang. 

Fak Zai top 10-a tling te
Hming    Veng/Khua
C. Lalhriatkimi    Chaltlang
Joseph Lalhruaitluanga    Chaltlang
K. Lalnunpuii Bungkawn
Lalhmingmawii Armed Veng South
Lalbiakfela    Bethlehem Vengthlang
Malsawmdawngliani    Bungkawn
Michael CR Lalpianfela Bungkawn
Rebek Vanlalnunpuii    Thingsulthliah
Shion Lalbiaknunga    Ramthar Hreichuk
Vanlalduhsaka    Kolasib Tumpui

Share now