Aizawl April 25, 2024 : April ni 19-a Millennium Centre bul sumo MZ 06-1493 ding laia bag, a chhunga wallet leh Rs. 38,000 awm rutu chu Police-ten chhuichhuakin Farkawn khua angin a inchhal a, Farkawn Re-Union Aizawl (FRUA) chuan an khawchhuak a ni lo tih an sawi.

Vawiin ni 25.4.2024 tlai khan ni 19.4.2024-a rukru man Lalthangkima 33 s/o Lalhmangaihzuala (L), Phunchawng-a chhungkua khawsa, Farkawn khua anga inchhal chu Farkawn khaw chhuak Aizawl-a awm inzawmkhawm, Farkawn Re-Union Aizawl (FRUA) hruaituten Aizawl Police Thana-ah kal chilhin duty te remtihna-in inkawmna leh zawhna hun an hmang a, Farkawn khua a nih leh nih loh finfiahna a ni a, Farkawn Re-Union Aizawl (FRUA) chuan an khawchhuak a nih loh thu a sawi tih ZALEN an hrilh.

Farkawn Re-Union Aizawl (FRUA) chuan, "He rukru hi Farkawn khua a nih lohzia finfiah a ni a. FRUA hruaitute hnenah Farkawn khua ni lo chunga Farkawn khua tihmingchhiaa Farkawn khua a intih avangin ngaihdam a dil a. FRUA hruaitute hian tun hnuah thu diklo hmanga Farkawn khua tihmingchhe tawh lo turin thu kan hrilh," an ti.