Nigeria lam chhuak daih a ni a; mahse, tun lai hian rimawi khawvelah thawhpui lian tak tak neiin Billboard chart lamah pawh a sang hle. Wizkid tia hriat hi a hming tak chu Ayodeji Ibrahim Balogun a ni deuh duah a, July 16, 1990-a Surulere, Lagos-a piang a ni.

African chhungkua tih takah an unau pawh 12 zet an ni a, rinna lama inang lo tak atanga sei lian a ni a, a nu hi Pentecostal kristian a ni a, a pa hi Islam a ni ve daih thung.

Wizkid hian Ijebu Ode Grammar School-ah a kal thin a. King Sunny Ade, Fela Kuti leh Bob Marley ngaithlaa sei lian a ni.

Kum 2012-a radio-a Tim Westwood nen an inkawm tumin a pa hian nupui pathum a neih thu a sawi a. Adesope, Factory 78 TV-in an kawmnaah group pakhat, Glorious Five an tih chu biak ina a thiante nen an lo din tawh thu a sawi bawk a, album tihchhuah hnu lawkah an inthen darh ta tih a sawi bawk.

Kum 11 mi lek a nih laiin hla a record tawh a, Glorious Five nen hian album an tichhuak a. Kum 2009 khan Empire Mates Entertainment (E.M.E) nen inremna an ziak a ni.

Studio album a tihchhuah hmasak ber, ‘Superstar’ (2011)-a a hla pakhat, ‘Holla at Your Boy’ avangin hriat a hlawh nghal hle a, ‘Tease Me/Bad Guys’, ‘Don’t Dull’, ‘Love My Baby’, ‘Pakurumo’, leh ‘Oluwa Lo Ni’ hlate pawh Superstar album-a mi niin single-in a tichhuak hmasa hlawm a, hengho pawh hi ngaihthlak a hlawh hlawm viau.

Kum 2014 khan a album pahnihna, ‘Ayo’ a tichhuak a. Single paruk a tihchhuah ‘Jaiye Jaiye’, ‘On Top Your Matter’, ‘One Question’, ‘Joy’, ‘Bombay’ leh ‘Show You the Money’ te chuan hriat an hlawh leh viau bawk a; mahse, E.M.E-a a contract a tawp zui tak avangin a kalsan ta a ni.

Khawvelin an hriat tanna erawh kum 2016 kha a ni a, Drake thawhpuiin single hit zet mai, ‘One Dance’ an tihchhuah chu a lar tak zet a, ram 15 zetah No. 1 a kai a. Heng zingah hian rimawi hmunpui, US Billboard Hot 100 bakah UK, Canada leh Australia a tel a. RCA Records nen March, 2017 khan contract pawh an ziak zui ta a ni.

A studio album pathumna, ‘Sounds from the Other Side’ pawh July thlaah a tichhuak nghal a, Caribbean mite ngainat zawng niin a larpui hlawm hle.

October 2020 khan a album palina, ‘Made in Lagos’ a tihchhuah chu a hit hle a, ‘Essence’ phei chu tunah pawh a la lar hle.