India ramah hmeichhe dinhmun chawikan a tul nia mi thehnemngai ten an hriat avangin theihtawpin hma an la a. An hmalakna chi khat atan chuan Parliament leh State Legislative-ah te hmeichhiate tan seat hauhsak ngai niin an hria a, heng rorelna in sang in hnihahte hian hmeichhiate tan seat 33% hauhsak nise an ti a ni.

Hmeichhiate tana seat hausakna ‘Women’s Reservation Bill’ hi September 12, 1996 khan Lok Sabha-ah khatih laia sawrkar laipuia roreltu United Front hotupa leh Prime Minister ni bawk, HD Deve Gowda chuan a pharh a. He bill-in a tum ber chu Lok Sabha leh state legislative assemblies ah hmeichhiate tana seat hauhsak a ni. He ruahmanna hnuaiah hian seat awm zawng awng zingah hmun thuma thena hmun khat (33%) chu hmeichhiate tan hauh a ni ang a, hei hi a inchhawkin a hmanna turah pawh (draw of lots) tura tih a ni.

He dan hian a tir atangin sawi a hlawh nghal a, tul ti leh tul ti lemlo an inthen nghal. BJP kaihhruai Vajpayee sawrkar khan tul a tih lemloh avangin Lok Sabha atangin he dan hi a hnukkir a, mahse Congress kaihhruai UPA sawrkar khan kum 2008-ah an tharthawh leh a. Rajya Sabha chuan March 9, 2010, khan pass tawh mah se Lok Sabha-ah erawh tun thlengin pass a la ni lo thung.

Hmeichhiate tana 33% seat hauhsakna hi Mizoramah chuan Aizawl Municipal Corporation leh Local/Village Council inthlanah te hman a ni a, hemi chungchangah pawh ngaihdan inanglo a awm a. Mi tam takin tha an tih laiin thlawp lo pawh mi eng emaw zat an awm. Mizo Hmeichhe Insuihkhawm Pawl (MHIP) President Lalthlamuani chuan an pawl chuan hmeichhiate tana seat hauhsak chu an thlawpin lawmawm an ti hle tih a sawi.

Zalen-in a kawmnaah Lalthlamuani chuan VC/LC leh AMC a hmeichhiate tan seat hauhsak a nih theih nan sawrkar an nawr ngar ngar tih sawiin MLA-ah pawh inthlan dawn apiangin political party hrang hrangte chu kawmin hmeichhe candidate a tam thei ang ber dah turin an ngen tih niin a sawi.

Hetih lai hian pa pakhat chuan hmeichhia te tana seat hauhsak chu tun dinhmunah chuan a la tul lemlo nia a hriat thu a sawi a. "Hmeichhia te tana seat hauhsak hi central lam hmalakna a ni a. Hnamdang (vai) te chuan hmeichhia hi an dah hniam a, anni society ah chuan hmeichhe chawikan hi thil tul tak a ni. Mahse keini ah chuan inenhranna a awm lo a, a tling leh fel chu an tling nawlh zel mai a, chuvangin keini ah chuan tul ka la ti lemlo a ni," a ti ve thung.