Dawr nghak turin RAgT negative certificate a ngaih ngei ngei hma daih tawh atang khan AH&Vety Department lam chuan Bawngsa zuar turte tan lockdown hnu atanga khan khauh takin dan an lekkawh tawh a, Aizawl bikah RAgT negative certificate nei lo tan Bawng talhna hmunah an Bawng talh te buaipui an phalsak lo.

Aizawl-ah hian Bawng te hi Slaughters House, Mualpui-ah bak talh phalsak an ni lo a, he hmunah hian sah theih sa diama puah nghal a ni thin. Lockdown tirh khan Bawng talhtu leh bawng kai zingah Covid-19 positive an awm tih hriat-chhuah a ni a, hei vang hian Slaughters House pawh hi khar ren rawn a ni a, hetihlai hian bawngsa sat thin te chu an buai thin hle niin thudawn a ni a, khawdai fem tui tamna laiah sa te hi an talh thin nia thu dawn a ni. Tunah erawh sa talhna hmun hi hawn leh a ni tawh a, a lut tur tan erawh zawm ngei ngei tur a awm a; RAgT negative certificate neih a ngai.

Hri avanga hian department lam an fimkhur tawh hle a, he hmun hi police venna hnuaih dah a ni a, Bawng talh tirtu, a sa sat tur leh a sa phur tur pawh RAgT negative certificate nei lo tan sa talhna hmun hi luh phal a ni lo. Bawngsa zuar te hi sawrkarin SOP a siam angin kar khatah vawikhat bak an inzuar thei lo a, ni sarih bak certificate hi pawm a nih loh avangin, kar tin Slaughters House-a an kal hma ni-ah test hi an paltlang ziah a tul a ni.

Aizawla Bawngsa zuar, Khawchhak lam atanga Bawng pawh la lut thin B. Lalthazuala chuan, "Bawngsa zuar ten test kan neih ang hian dawr nghak leh chawhmeh zuar te pawh hian test hi nei ve vek se kan ti thin a, tunah chuan sawrkar lam pawhin hei hi an kalpui tawh a, a lawmawm khawp mai. Mahse, vawiina min dawrtu te atanga hian eng dinhmunah nge kan din dawn tih erawh kan sawi thei bik lo. Keini lam hi chuan hri hi kan theh-darh lo turah kan inngai," tiin ZALEN a hrilh.

Vety lam hian Slaugters House mai bakah an farm  hrang hrangah pawh an ran enkawl a zirin SOP zawm tur an siam vek a, heng zawm tur an duan te hi Covid Appropriate Behaviour (CAB) zulzuia siam a nih vek thu Dr. Lalhmingthanga chuan a sawi. Slaughters House-a RAgT negative certificate an demand chhan chu thawktute mai bakah mipui himna tura thil pawimawh tak a nih thu a sawi bawk.