Mizo Kristiante hian hun eng emaw lai atang khan kan hunpui, Krismas pualin thawmhnaw thar neih kan tum thin a. Hmun hrang hrangah bazar awm bawk mah se kan bazarna hmunpui ber, Bazarpui kan tih mai chu Aizawl New Market hi a ni a. Karleh maiah Krismas hi a thleng dawn a, bazarpui pawh a lun chho tan hle.

ZALEN zawhna chhangin Aizawl New Market enkawltute chuan sikul naupang an la chawlh kim chiah loh avang leh kum danga sumdawnna hmun thinah building sak mek a nih bawk avangin kum dang ai chuan bazar hi a la lun lo niin an sawi a. Kar thar lamah chuan a tawt tawh an rin thu an sawi.

Bazar enkawltute chuan hetia mipui pungkhawm zingah hian mi sual, mi pawisa ruk tuma chang reng pawl an awm thin avangin bazara chhuakte chu fimkhur se an duh tih an sawi a. “Kumtluanin thil bo report hi a awm reng a, a bikin krismas vuakvetah hian pawisa bo hi a tam thei hle a. Thil bote hi hmuh let a har thin khawp mai a; chuvangin, mipuite hi fimkhur hle se kan duh a ni,” an ti.

Pick pocket zingah mipa aiin hmeichhia an tam nia an hriat thu an sawi bawk.

Bazar enkawltute chuan thil bo an hnena report hi kuminah ringawt pawh 70 chuang a awm tawh niin an sawi a, heng zinga a tam ber hi pawisa ip (purse leh wallet) an ni tih an sawi.

Thil chhar an hnena report a awm chuan a chhartu address chiang taka record-in a tibotu an chhui thin a, a tibotuin a rawn lam chuan a chhartu nen an inbiaktir thin a. A tibotu an hmuh zawh loh chuan a chhartu hnenah an pe leh mai thin niin an sawi.

Aizawl New Market-a dawr neitu pakhat chuan mas dawna bazar hi a tlem chho hret hret nia a hriat thu a sawi a. “Thawmhnaw zawrhna dawr lian tak tak hi a tam bakah Millennium Centre a awm a. Hei bakah online hmangin mi tam takin thawmhnaw an chah tawh bawk a; chuvangin, kum hmasa lama kan inhralh zat hi kan inhralh loh mai ka ring hial a ni,” a ti.

Pa pakhat pawhin, “Tun hma deuh kha chuan lirtheite a tlemin mas dawnah sawrkar bus (MST) leh private bus hmangin Aizawlah kan bazar thin kha a ni a. Tunah erawh khaw tinin maxicab service kan nei ta vek mai a, duh hun hunah Aizawla kal theih tak avang hian mas dawna bazar ang chi pawh kha a tlem sawt khawpin ka hria,” a ti ve bawk.