Feature : Chawhmeh man to

Admin - May 22, 2021

Ni danga chawhmeh tel 1 Rs.50 vel ni thin chu Rs. 70/80 ah te a kai chho | To hle mahse chawhmeh tel lova kan khawsak theih miau loh avangin kan lei tho a ngai

Covid-19 hluar thar leh avangin Mizoram chu nasa takin kan buai a. Nitin positive hmuhchhuah chuan tlem lam a la pan thei lo a, sawrkarin positive te a enkawlna hmun chuan a daih lova, hmun dang siambelh zel a ngai. Covid hian kan nitin khawsak phung a tihbuai mai bakah nitin mamawh chawhmeh man pawh a tih to phah hle.

Ni danga chawhmeh tel 1 Rs.50 vel ni thin chu Rs. 70/80 ah te a kai chho a, to hle mahse chawhmeh tel lova kan khawsak theih miau loh avangin kan lei tho a ngai a. Sa erawh a rate ngaiin an la zuar thei thung a, chawhmeh man a to em avang hian chhungkaw tam tak chuan sa hmeh mai chu tihchi zawkah an ngai hial. Chawhmeh man to chungchangah hian 'Chemtatrawta thawnthu' ang mai in a 'Kaikuang' ah an inpuh tawn chho mek.

Aizawl khawpuiin chawhmeh an lakna ber pakhat Serchhip Zawlpui a thlai chingtu pawl hotu PC Siamliana chuan chawhmeh zuar ten an tito lutuk chu lungawithlak a tih loh thu a sawi a. "Tunhnaiah thlai a rem deuh avangin ni dang ai chuan tlemin kan tito lo thei lo a. Mahse kan tihtlawm lai pawhin a lachhawngtu te hian awm hmunah hlep an tum nasa lutuk a, duhtawkin hmun leh hmunah min eisak ni berin ka hria. Kan pek tlawm tum pawhin to uchuak takin an pe chhuak leh thin a ni," tiin Zalen a hrilh a. Bawkbawn kg khat Rs. 12 a an pek te chu hmun leh hmunah a lachhawngtu te hian Rs.20 ten an pe leh nghal niin a sawi.

Aizawl veng pakhata chawhmeh zuar chuan an thlai man an tito chu hrehawm a tih thu leh an lakna a san avanga loh theih loha tihsan ngai a ni tih ZALEN a hrilh a. "Keini hi chuan direct in kuthnathawktute hnen atang hian kan la ve thei lo a, commission vawi 2 paltlang hnua kan lak ve chauh te anih avang hian hlep neih ve kan duh si a, chuvangin a to lo thei lo a ni," a ti a. Kharchhawng hnen atanga an lakna chu tlawm deuh se chuan an thlai zawrh pawh an ti tlawm ve thei deuh sawn niin a sawi.

Tunhnaiah thlai rah leh a hnah man a to em avang hian Aizawl veng pakhata Local Level Task Force chuan direct in chawhmeh hi an la a, mipui hnenah hlep nei lovin an hralh leh a, man tlawm zawkin mipui ten an lei theih phah niin an sawi. Veng pakhata LLTF pawhin an veng chhunga chawhmeh zuar te kokhawmin an thilzawrh ti to lo turin an ti (hau) a, hei hi a sawt hle niin an sawi.

Bazar (market) enkawltu Commerce & Industries department hotute chuan chawhmeh to zel chu control tumin hma an la mek niin ZALEN an hrilh a. "Aizawl DC chairman na hnuaiah sa leh thlai man to lutuk tur khuahkhirh tumin hma kan la mek a. A bultanna atan chawhmeh zuar ten khawi hmun atangin an lak tih leh an lakna rate te kan zirchiang mek a ni," an ti bawk. Pa pakhat pawhin tunlai hrileng vanga Mizoramin harsatna kan tawh laia mi thenkhat ten to uchuak taka chawhmeh an zuar chu Kristian rama thleng ah chuan mawi lo hlea a hriat thu sawiin, "Thil reng reng hi a man awm tawk a awm a, behlawi tel lian deuh hlek te hi Rs.50 te ni sela chuan a awm tawk viau a, mahse tel lian lemlo tak mai Rs.80 a han ni te hi chu a awm ka ti lo hle. Mahni lei turin han hisap ila kan lei ngam ang em? ka ti hial a ni," a ti ve bawk.

Share now