Kum khat chuang Covid-19 in min chamchilh tawh a, hripui hi a reh deuh dawn emaw tih hnuah tunhnaiah a vei/kai thar an pung chho leh a. Engtia rei nge hri hian min chenchilh dawn hriat a ni lo a. Hri kai enkawlna hmun atanga dam a chhuak te lo dawnsawn danah ngaihdan hrang hrang leh inhnialna a awm a, a hlauhawm loh nia mithiam ten an sawi laiin mipui lamah hlauhna a la awm zel niin a lang.

July ni 19,2021 a Covid-19 damlo te enkawlna dan thar 'Revised Discharge Protocol' tihchhuah ah chuan natna lang chhuak lo te zingah natna hrik hmuh chhuah a nih atanga ni 10 chhung chu uluk taka enthlak (observe) an ni ang a. Enthlak chhunga a tawp lam ni 3 chhunga khawsik an neih tawh loha harsatna an neih loh chuan chhuah (discharged) theih an ni. Chhuah dawnah RAgT/TrueNat/RT-PCR-a test a ngai tawh lo tih a ni a. Covid-19 hri kai natna lang chhuakte zingah natna a lan chhuah atanga ni 10 chhung uluk taka enthlak an ni ang a. Enthlak chhunga a tawp lam ni 3 chhung emaw a aia rei emaw khawsik an neih lohva, oxygen saturation pawh 95% aia sang an nih bawk a, harsatna an neih loh chuan chhuah theih a ni ang. Chhuah dawnah RAgT/TrueNat/RT-pCR a test a ngai lo tih a ni bawk.

Covid-19 symptom lan hma ni 2 leh symptom lan chhuah hnu ni 5 chhung hi midang kai chhawn theih hun lai a nih thu Medical Operation Team (MOT) member te chuan an sawi a. Symptom lan chhuah atanga ni 5 hnuah chuan kan taksa a natna do tu (neutralizing antibodies) a rawn tam a, chu chuan virus rawn beiin viral load chu a tla hniam nia sawiin tuna kan discharge protocol hman mek hi a him tawk thu leh WHO, ICMR leh CDC-te pawhin hetiang ang inkaihhruaina hi an pawm thu an sawi a ni.

State Nodal Officer Dr. Pachuau Lalmalsawma chuan tuna damlo an chhuahtir dan chu 100% a ni lo mai thei a, mahse a him tawk niah an ngai tih a sawi a. Senior Doctor pakhat pawhin ni 10 enkawl hnuah chuan midang kaichhawnna chance a awm tawh lo nia an ngaih thu sawiin enkawlna hmun atanga chhuahtir te chu mipui te pawhin hlau tawh lo se a duh tih a sawi bawk.

Hetih lai hian veng/khaw tam tak chuan Covid-19 enkawlna hmun atanga hri vei chhuahtir te pawn chhuahtir nghal ngawt mai chu a him tawk lo nia hria in veng engemaw zat chuan an veng chhungah inkaihhruaina an siam a. Veng thenkhat chuan hrivei enkawlna hmun atanga lo chhuak te chu ni 7 an khung hrang leh a, veng thenkhat RAgT a exam leh te pawh an awm bawk.