Hripui Coronavirus 'Covid-19' chuan kum khat chuang lai mai Mizoram pawh min chamchilh ta reng mai a, nitin khawsak phung a buai a, thenawm khawveng pawh ni dang angin kan inpawh hleithei lo. Damlo mi sangtel kan awm mek a, Covid-19 vanga thi pawh 100  chuang fe kan ni ta.

Covid-19 avang hian kan damdawi in te pawh khum a indaih lo tawh a, hri vei te enkawlna hmun (CCC) ah pawh enkawl sen loh an awm chho ta reng mai. Veng hrang hrangah community covid care centre (4C) siam ni mahse hei pawh hian min zo ta lo. Hetih mek lai hian hri lahin kianzai a rel lo mai ni lovin nitin kan pung telh telh emaw  tih mai tur a ni a, Covid-19 hi chuan min tibuai tak zet a ni.

Covid-19 hian sawrkar thuneitu lam a tihbuai chu thuhran nise tualchhungah pawh Task Force ten an hahpui hle. Task Force hi sawrkar hian a tangkaipui a, hetianga an kutke ber tur Task Force a din hi sawrkar thiltih fuh tak pawh a ni awm e. Task Force te hian hrikai an awmin chhuizui hna (contact tracing), hrikai buaipui, khunghran ngai (home quarantine) an awma buaipui, damdawi in leh community quarantine centre a dah tura buaipui, CCC an lo chhuah hnua buaipui zui, hrikai an awm tamna hmun te containment zone a puan leh vil zui, khunghran te buaipui zui leh thildang tam tak an thawk a. Task Force hi awm ta lo se chuan sawrkar tan hripui hi buaipui zawh ngaihna a awm lova, sawrkar thuneitute tam taka an chhawk avangin Task Force hi an tangkai hle.

Task Force member pakhat chuan Covid-19 vanga buaina thleng chu kiang tawh se a duh hle tih ZALEN a hrilh a. "Hrikai an awmin contact tracing tih a ngai a. Anmahni hnaihtu te khunghran tura buaipui a ngai a, khunghran te ei leh in tur ngaihtuah pui an lo ngai leh a. Mi thenkhat chu pachhe ve te te te an lo ni a, CCC an awm man te pe hleithei lo leh an lo chhuah hnu pawha an awmna tur ngaihtuah zui leh a ngai bawk a. Covid-19 hi chuan min tibuai tak zet a, min kiansan tawh se ka duh hle a ni," a ti.

Pa pakhat pawhin sawrkar tan pawh rorel thiam a har dawn hle nia a hriat thu sawiin, "Sawrkarin khauh taka inkhuahkhirh kalpui a tum lahin mipui lamin kan sawisel a, ei leh in lamah harsatna kan tawk a, kan economy lamin a tuar bawk si. Tlema inthlahdul an tih lahin hrikai an pung tual tual mai bawk nen kan tana tha ber tur pawh hriat a har dawn hle mai," a ti a. Hrikai pun chhanah sawrkar mawhpuh theih anih bik loh thu sawiin, "Sawrkar hi chuan theihtawp a chhuah niin ka hria a, mipui lam hian kan tihtur hi kan ti tawk lo niin a lang. Thenawm khawveng inlenpawh loh tur a ti chungin mipui hian inlenpawh bakah kan himna tura ruahmanna chi hrang hrang hi kan zawm tha lo em mai a, chuvangin Covid-19 vang hian kan la buai chho zel dawn niin a lang," a ti ve bawk.