Dawhfawh hi kan pi leh pute atanga thei kan neih zinga mi a ni a, thlawhhmaahte chingin eng emaw zat an thar ve thin a. Loa an chin bak chu a hranpain an ching lem lo a, tun hnai kum 4/5 kalta vel atang khan khawchhak lam dawnfawh lian chu chaw lutin an ching ve tan a. Mi tam takin eizawnna atan hmangin sum lakluhna hnar tha takah a chang ta a ni.

Hriat theih chinah dawnfawh lian kan tih hi Ngopa, Lamzawl, Pawlrang, Bungtlang, Serchhip Zawlpui leh Lawngtlai lamah chin a ni a. Kumin atang hian khaw thenkhat chuan an ching tan ve leh bawk.

Heng dawnfawh ching zingah hian Ngopa, Lamzawl leh Pawlrang hian an thar tam deuh a, Aizawl leh Mizoram hmun hrang hrangah an hralh chhuak mek a ni.

ZALEN-in a kawmnaah Ngopa Dawnfawh Ching Association hruaitute chuan tunlai hi dawnfawh thar vanglai niin an sawi a. Ngopa khua chuan kumin hian quintal 1,300 vel thar an beisei tih sawiin an dawnfawh chu a zuar chhawngte hnenah kg-ah Rs. 35 leh 40 hisapten an pe thin niin an sawi.

Ngopa dawnfawh chingtute chuan an dawnfawh thar chu a thlum tha hle nia sawiin mi thenkhat chuan phai lam aiin a thlum zawk an ti niin an sawi.

Dawnfawh chu thil chhe hma tak a nih avangin a thar vanglai hi chuan sawrkarin state pawn atanga lakluh khapsak thei se an duh tih ZALEN an hrilh bawk.

Dawnfawh hi khawchhak lam atang pawhin eng emaw zat chu a lo lut ve bawk a. Burma sipai sawrkarin kawng an hawn chuan lo lut hi a tam a, an hawn that loh chuan Mizorama lut a tlem a, a hralhna rate pawh a san phah thin nia thudawn a ni.

Pa pakhat chuan thei leh thlai hralh kawngah a zuar chhawngten hlep neih tam an tum lutuk thin avangin mipuiin an lei to phah nia a hriat thu a sawi a. “Dawnfawh pawh hi a chingtute hnen atangin a pum tê deuh chu kg-ah Rs. 35 leh a lian deuh chu Rs. 40 hisapten an la bawk a. Mahse, an zawrh chhawn lehnaah hian kg-ah Rs. 60 hisapten an hralh leh a, hlep nei lo chuan an zuar tur a ni lo a; mahse, mi rethei zawkte dinhmun hre chungin tun ai hian tihniam thei deuh se chuan ka duh khawp mai,” tiin ZALEN a hrilh.