India ram hmun hrang hrangah dengue natna a hluar hle a. Mizoramah pawh kum 2021-ah a vei hmuhchhuah 83 an awm a, nikum khan he natna vei mi 1,868 awmin kumin April 19 thleng khan a vei hmuhchhuah 142 an awm tawh.

Hriat theih chinah dengue vang hian mi panga laiin nunna an chân a, mi thenkhat chuan hei aia tam daih hi an thi niin an sawi a; mahse, a test-na bik, Elisa test lo chu official-a pawm a nih loh vangin he natna finfiaha thi zat hi panga chauh a ni ta a ni. 

India ram pumah kum 2022 Jan – Oct thla chhungin dengue vei mi 1,10,473 awmin mi 86-in an thihpui.

Tun hnai khan Chanmari YMA Hall-ah State Vector Borne Disease Control Programme (SVBDCP) buatsaihin Aizawl Municipal Corporation (AMC) hnuaia local council, MHIP leh MUP te chu dengue chungchang zirpui an ni a. He huna thusawitu, health department thawktute chuan India ram hmun hrang hrangah dengue hi a hluar hle niin an sawi.

Dengue natna lan chhuah dan chu khawsik, lu na leh mitmu na, taksa/tihrawl leh ruh chuktuah na, sentut anga vuna bawl sen awm, chaw ei tui lo/pumna/luak chhuak/kawthalo/chau ngawih ngawih, hnar leh hahni atanga thisen chhuak te an ni tiin hetianga kan awm a nih chuan doctor rawn vat tur a ni tih an sawi.

Health department thawktute chuan dengue natna hriat chhuah nan hian sawrkarin Elisa khawl hmanga en chauh lo chu a pawm lo tih sawiin Elisa hmanga a thlawna thisen enna hmun hi Civil Hospital, Aizawl leh Civil Hospital, Lungleiah a awm tih an sawi a. Heng bakah hian private laboratory - Genesis, Lal Path Lab, Ding Dong Laboratory leh Lifeline Laboratory-ah man chawiin Elisa khawl hmangin a test theih tih an sawi bawk.

Health department chuan dengue natna thlentu thosi tui theihna ang chi tui tling mahni in leh a vela awmte tibo vek turin mipui an ngen a. Dengue thlentu thosite chuan khaw ên laiin mi an seh thin tih sawi bawkin in chhunga thosi hlo chhit leh hal chi hman uar a, thosi len zar that chu invenna atan a pawimawh hle niin an sawi bawk.