Tunlaia titi luahtu ber pakhat chu electric bill hi a nih ngei a rinawm. Dawr hawng ngai lo te electric bill a hniam phah chuang lo a, kawlphetha hmanga thil siamchhuak thin ten thla engemaw zat an khawl an tinung tawh lo chungin an bill a hniam phah chuang lo. Chhungkaw tam zawkin tum dang aiin bill an chawi tam niin an sawi a, sawrkar lam chuan bill tihsan vang niin an pha thung.

Lockdown avangin Power & Electricity Department chuan Joint Electricity Regulation Commission (JERC) in ralkhat atanga bill siam theih dan an duansa angin bill hi an siam a, hetia an siam chhan hi hmun tam tak containment zone a puan a nih vang leh Covid 19+ In lama inenkawl an tam vangin meter reader te tan hna thawh a buaithlak vangin hetianga ral atanga reading hi la ta niin an insawi. Bill pek mumal theih loh chhung rei bawk, bill tih san lo ni ta nen mipui tan phurrit a ni lo thei ta lo a ni.

Social media leh chanchinbu lamah pawh electric bill chungchang hi mi tam takin an ziak a, social media lama comment pek danah ngaihdan pawh a inang lo hle. Bill hi tam uchuak ti an tam hle a, sawrkar sum nei loh vanga mipui pek tur bill tisanga puh a, politics zawnga lo her an kat nuk bawk. Chutihrual chuan bill punna sang chak lutuk leh kan lockdown innang mai bakah, ral atanga meter reading an tih hian nghawng a nei thui phah hle, a tih theih.

Electric bill chungchangah ZALEN in a biak pakhat chuan, "Electric bill sang chungchang hi ngaihtuah chian a ngai khawp mai. Tun tuma bill sang ta vak mai pawh hi sawrkar lam sawi dan ang anih hi chuan thil ni thei pawh a ni. Chutih rual chuan electric leh tui bill kalphung hrim hrim hi chu hriatthiam a har. Electric meter kan neih ang bawkin Tui meter kan nei bawk, kan tui dawn khawlna leh kan electric hman dan ngaihtuaha kan bill insan hleih lutuk thin lai tak hi kei chuan a veiawm ka ti. Kan tui dahna a pung ta pawh ni si lo, kan current hman punna em em tur hriat bawk si loh, bill lah a let aia tama an pung thin te hi hriatthiam a harsa a ni," tiin a sawi.

Khaw danga chhungkua a hnathawka awm thin, Aizawla In nei tho pakhat pawhin Electric bill an awm lai leh lai leh a awm loh laia a inthlau tlem lutuk chu  a hriatthiam loh thu a sawi a, tui erawh an inluah te nen intawm an nih thu leh hetah pawh an awm leh awm lo a danglam tam lo tih ZALEN a hrilh.
    CYMA in political party NGO hrang hrang inrawnkhawmna a neih pui tum khan tui bill leh electric bill leh tui bill hi sawrkar hian Lockdown chhung chu ngaihhnathiam tura sawrkar ngen an rel a, mahse, meeting hian BPL chhungkua leh AAY chhungkua te bill tihhniam turin thu an titlu a, mahse, hei hi a taka kal pui a la ni lo a, electric bill rawn sang leh ta hluai nen hei hian sawi pawh a ti tam hle.