FEATURE : Faina Lamtluang

Admin - Oct 03, 2021

Hmasawnna tur a la tam hle

Mizote hi kan pi leh pute hunlai chuan fai an ngai pawimawh lem lo a. Mipate phei chuan inbual khat kha chapona atan an hmang hial emaw tih mai tur a ni. Mahse sap missionary ten min zawnchhuah hnuah fai pawimawh zia min zirtir a, kum 100 chuang kristian kan nih hnu hi chuan faina kawngah nasa takin hma kan sawn a. Chutih rual erawh chuan hmasawn zelna tur erawh a la tam hle.         

Sawrkar laipui chuan kumtin India hnampa Mahatma Gandhi piancham chawlhkar hi 'Faina Hapta' atan a hmang thin a, Mizoramah pawh tunkar hian he hapta hi hman a ni dawn a. Kum dangah chuan hnatlang ten khawlai leh hmun remchang laite tihfai thin a ni a, kuminah erawh chuan hripui vangin hnatlang hi neih theih a ni lo a ni.

Aizawl khawpui bawlhhlawh sawngbawltu SIPMIU ten Tuirial dumping ground a bawlhhlawh paih dan an chhinchiahna ah August, 2021 khan bawlhhlawh paihtu lirthei 2406 awmin an bawlhhlawh paih zat chu kgs 19,32,407 a tling a. 

September, 2021 ah bawlhhlawh paihtu lirthei 2775 awmin an paih zat belhkhawm chu kgs 20,07,932 a tling a ni. Bawlhhlawh paihna hmunah hian thla tinin bawlhhlawh paih hi a pung ve zel a, bawlhhlawh thliarhran kawngah pawh kan ti tha sawt viau a, hei hian faina kawngah hma kan sawn zel tih a entir thei awm e. 

Aizawl khawpuia zingtin hmunphiat thin nu pakhat chuan bawlhhlawh paih leh faina kawngah Mizo ten nasa takin hma kan sawn nia a hriat thu a sawi a. "Tunhma deuh kha chuan luikawrah te hian engkim mai hi kan paih ni mai hian a hriat a, tunah erawh chuan kan ziaawm ta hle a. Mahse hetih karah hian mi thenkhat erawh a rem rema bawlhhlawh la paih an awm a, mahse heng pawh hi an tlem tawh khawpin ka hria," a ti a. Khawlaia bawlhhlawh tam zual chu thil eina kawr te, bottle ruak leh disposable no ruak bakah thinghnah tla te niin a sawi.

Mizoram state pawna lehkha zira awm pakhat pawhin Mizoram chu faina kawngah hma a sawn nasa hle niin a sawi a. "Kan duhthawhna lamah kan la fai lo hle niin kan sawi thin a. Mahse India ram khawpui upa zawk leh kum tam tak inrelbawlna fel tak lo nei tawh te pawh hi an la bal em em mai a. Keini erawh chuan kan tangrual a, Aizawl mai bakah khaw dang te pawh hi an fai thawkhat viau in ka hria a ni," a ti a. 

Faina kawngah mipui ten theihtawp an chhuah nia a hriat thu sawiin sawrkar hian tun ai hian luikawr leh lungrem te tihfai kawngah hma la deuh se chuan Mizote chu thu kan awih avangin India rama state fai ber kan nih theih a beisei thu a sawi bawk.

Share now