Grape hi theirah pawimawh leh lar tak mai a ni a. Bible-ah pawh a sawina hmun eng emaw zatah a awm a. Mizoramah chuan eizawnna atan Hnahlan hi a ching hmasa niin a hriat a, hemi hnu hian Champhai leh a chhehvelah chin ve leh a niin heng khaw pahnihte hian society changtlung tak an din a. Society hian kuthnathawktute grape chu leiin an thiam ang angin an sawngbawl a, heng an siamchhuahte hi khaw hrang hrangah zawrh chhuah niin hralh erawh a kal lutuk lo nia hriat a ni.

Hnahlan Grape Growers & Processing Cooperative Society hian a tirah chuan ‘Zawlaidi’ an siam a, hun eng emaw lai kha chuan hralh a kal viau a. Mahse, tun hnaiah hralh a kal ta vak lo a, hei vang hian an siamchhuah chu tichangkang zawkin ‘Isabela’ tih an vuah a. He thil hi chu a changkangin khualzin leh hmun danga thawnchhuahah pawh a zahpuiawm lo nia hriat a ni.

Champhai Grape Growers Society hian an winery atangin ‘Champwine’ an siamchhuak ve thung a. Hnahlan lam siamchhuah aia a man a tlawm zawk avangin hralh pawh a kal deuh zawk niin an sawi a. Champhai Grape Growers Society hian Champwine mai bakah Baptist Church of Mizoram nen inremna siamin an grape tui hi sacramental wine-ah an hralh a. Hei mai bakah state dangah pawh eng emaw zat an hralh bawk.

Excise & Narcotics Department chuan Hnahlan leh Champhai winery atanga grape siamchhuah hralh tur hian mi 53 hnenah phalna (vendor licence) an pe mek a, hengte hi mi mal sumdawng 51, corporation leh club pakhat ve ve an ni a. Licence nei zingah hian mi 34-te chuan tha takin an zuar mek a, an zinga 19-te erawh an chawl hrih thung a. Heng chawl hrihte hi eng emaw harsatna avanga permit la tinung leh lo te niin an permit hi cancel tihna a ni lo niin END thawkte chuan ZALEN an hrilh.

Excise & Narcotics department hian wine hralhchhuah turte hi zu tam lam (alcohol content)-ah 12% ni turin an bithliah a, 12% aia 2% a sang leh hniam pawh an pawmsak a ni.

ZALEN-in a kawmnaah Excise & Narcotics Department thawkte chuan kuthnathawktute hamthat nan wine rules chu ennawn an tum mek tih an sawi a, grape wine chu hotel-ten an kawl theih nan hmalak bakah online payment hmanga grape lei leh hralh anih theih nan hma an la mek niin an sawi.

Grape chingtu leh society chuan a tam thei ang ber hralh se an duh hle tih sawi bawkin a hralhna lamah pawh limit siamsak an ni lo a, zuar duh an awm pawhin vendor licence hi a rang thei ang berin an tihfelsak zung zung zel niin an sawi.

ZALEN zawhna chhangin Aizawl khawpuia wine vendor pakhat chuan, “Mi changkang leh khualzin hian a tlangpuiin Isabela hi an duh zawk a, tlemin a man pawh to deuh hlekin bottler khat hi Rs. 500-in kan hralh a. Hetih lai hian tleirawl leh mi tam zawk hi chuan a tlawm deuh zawk avangin Champwine hi an lam tam zawk a, kan hralh tam zawk chuan kan hria a ni,” a ti.

Hetih lai hian pa pakhat chuan tuna grape-a alcohol content awm chu tihsan deuh nise tha a tih thu a sawi ve thung a. Hei hian zu dona kawngah pawh a puiin khualzin pawhin an duh phah a rin thu leh tual chhungah pawh hralh a kal zawk a rin thu a sawi ve bawk.