Mizoramah tun hnai hun eng emaw chen atang khan ruihhlo chi khat heroin a hluar hle mai a. Thalaite zingah thihpui an tam hle a, Excise & Narcotics Department (END) chhinchhiah danin kumin thla hnih chhung ringawt khan damdawi hman sual vanga thi hi mi 19 an awm tawh a. Heng zinga 17 hi mipa niin a dang pahnih hi hmeichhia an ni a, an vai hian heroin leh a kaihhnawih ti thin vek an ni. 

Excise & Narcotics Department chhinchhiah danin kum 1984 atanga kumin February thla tawp thleng khan Mizoramah damdawi hman sual vanga thi hi mi 1,736 an awm tawh a, heng zinga 1,531 chu mipa niin hmeichhia 205 an awm bawk a ni. Heng ruihhlo ti thinte hian heroin leh a kaihhnawih chu an thihpui tam ber a ni.

Chhinchhiahna atanga a lan danin kum 2020 kha damdawi hma sual vanga Mizoramah mi an thih tam ber kum niin hemi kum hian drug overdose vanga thi hi mi 67 an awm a. Kumin thla hnih chhungin damdawi hman sual vanga thi hi mi 19 awmin hetiang zela a kal chuan kumin hi damdawi hmans ual vanga thi an tam ber kum a nih mai a hlauhawm hle.

Nikum khan damdawi hman sual vang hian mi 43 an thi nia chhinchhiah a ni a, kumin thla hnih lek chhunga thi hi nikum zatve deuh thaw a ni.

Excise & Narcotics Department chhinchhiah danin heroin an man pawh hi a kum telin punlam a pan zel a. Kum 2018 khan 8.567kgs an man a, kum 2019-ah 12.596kgs, 2020-ah 11.710kgs, 2021-ah 18.906kgs, 2022-ah 33.418 kgs manin kumin thla hnih, January leh February thla khan 6.182kgs an man a ni. Thla hnih chhung leka heti zat an man chuan kum tawpah phei chuan an man hi a tam hle tura ngaih a ni. 

Heng a chunga tar lante hi Excise & Narcotics Department-in an man chauh a ni a. Hei bakah hian police-ten eng emaw zat an man bawk a, man loha chhuak hi eng zat tak ni ang maw tih zawhna a awm bawk.

Tun ang zel kan nih chuan Mizo thalaite hian heroin hi an la thihpui dawn chauh niin mi thiamte chuan an ngai.