DOWNLOAD OUR APP

Read latest news on your phone
app-store

FEATURE : Hri ziaawm zel, thawh 4-na ring chiah lo

May 15, 2022

Hripui, Covid-19 chuan khawvel pumah ziaawm lam a pan chho zel a, Mizoramah pawh hri kai hmuhchhuah an tlem zel. Mizorama Covid-19 buaipuitu ber, IDSP State Nodal Officer Dr. Pachuau Lalmalsawma chuan hri kai thar an tlahniam niin ZALEN a hrilh a. “Hri kai nia inringhlel kan test hi a tlem chho ve zel a, hetia test a tlem hi chuan test tur an tlem tihna a ni a, a lawmawm lamah kan ngai a ni,” a ti. 

Hripui, Covid-19 chuan khawvel pumah ziaawm lam a pan chho zel a, Mizoramah pawh hri kai hmuhchhuah an tlem zel a. Mipui mimir ah pawh hri kan dawnsawn dan a inthlak chho zel a, hri len tan tirha hri kai kan hlauh ang em em kha awm tawh lovin hri kaite pawhin an tuar nep deuh niin a lang.

Mizorama Covid-19 buaipuitu ber, IDSP State Nodal Officer Dr. Pachuau Lalmalsawma chuan hri kai thar an tlahniam niin ZALEN a hrilh a. “Hri kai nia inringhlel kan test hi a tlem chho ve zel a, hetia test a tlem hi chuan test tur an tlem tihna a ni a, a lawmawm lamah kan ngai a ni,” a ti. 

Dr. Pachuau Lalmalsawma chuan hri kai report loh leh report duh loh ang chi chu Mizoramah a awm ve lo nia an hriat thu sawiin, “A nih ang angin kan report zel a, kan thawh that vangin kan positivity rate pawh hi a sang a. Test tur awm ang ang chu kan test nghal zel a ni,” a ti. 

Dr. Sawma chuan tun hnaia Covid-19 vei hmuhchhuahte chu natna lang chhuak nasa an nih loh chuan in lamah an inenkawl an phalsak zel tawh niin a sawi bawk. 

Mizoram State Medical Council President leh Covid-19 expert committee member ni bawk Dr. Lalbiak Kima pawhin Mizoramah hri kai an tlem ve tawh hrim hrim niin a sawi a. “Hri kai hi an tlem chho zel a, a kai chhunte pawhin an la na lo tlangpui a, ICU-a awm ngai pawh an awm meuh tawh lo a ni,” a ti. Dr. Biakkima chuan hri chu a la awm reng avangin fimkhur a ngai tih sawi bawkin, “Hmai tuamna (face mask) vuah that reng hi a pawimawh a. A bikin tar chak lo leh natna benvawn nei te phei chu fimkhur lehzual se a tha a ni,” a ti bawk. 

Mi thenkhatten Covid-19 hripui thawh 4-na leng leh thei nia an sawi chungchangah Doctor thiam te chuan hriatlawk ni lo mahse hri danna mipuiin an lak that avang leh taksaa natna dotu a chak chhoh zel avangin a thlen a rinawm loh zawk nia an hriat thu Zalen an hrilh bawk.

Kumin bikah hian Mizoramah Covid-19 hri kai thar 86,331 hmuhchhuah a ni tawh a, hri vanga thi 152 an awm tawh bawk. Hri kai zat positivity rate pawh a tlahniam thla ve hret hret a, January thla khan positivity rate hi 19.75% a ni a, February-ah 25.16%, March ah 15.27% niin April-a positivity rate chu 12.74% a ni. May thla a la ral loh avangin positivity rate hi a la hriat loh a, May thla chhung hian hri kai hi mi 5,431 an awm tawh a, thla hmasa ai chuan positivity rate hi a tlakhniam rin a ni.         

Zirtawpnia sample enfiah atangin Covid-19 kai 63 hmuh a ni a, mipa 26 leh hmeichhia 37 an ni. Hri kai hmuhte hi Rapid Antigen test atangin 60 leh ZMC RT-PCR atangin 3 a ni.

Share now