ZALEN January 12, 2025 : Tun hnaia China-a hri leng thar, Human Metapneumovirus (HMPV) vei India ramah mi pariat an awm tawh a, he natna vei hi Mizoramah chuan hmuh a la ni lo. Health department chuan he natna vang hian chiai lo turin mipui an ngen.

HMPV hi kum 2001 khan Netherlands-ah hmuh tan a ni a. Natna chi khat niin khawsik, khuh, hahchhiau, hrawkna leh hnar ping ang te-in a thawk deuh ber.

Tun hnaiah he hri hi China-ah hmuh a nih avang leh mi tam takin an vei avangin khawvel a ralkhel hman a. Covid-19 lo chhuahna ram a nih bawk avangin mi tam tak an chiai a; mahse, mi thiamte chuan Covid-19 nen a inang lo niin an sawi a. Tun thlengin a invenna emaw, a damdawi emaw hmuhchhuah a la ni lo bawk.

Mi thiamte sawi danin HMPV hi hritlang nen a inan deuh avang leh a invenna kawngah pawh Covid-19 nen a inan deuh avangin hnar, ka leh mit te kut fai lova khawih lo turin mipuite an ngen a. A hrikte hi khuh leh hahchhiau zawnga phuh chhuah thin a ni tih sawiin hmai tuamna (mask) hman that a pawimawh tih an sawi bawk.

Doctor thiamte chuan HMPV hi a hrik kai atanga ni 5-7-ah a natna a lang chhuak tlangpui a. A hrik paite hian an kai atanga ni 5-7 velah virus hrik hi an khuh/phuh chhuak tam tlangpui a, hei hi mi dang an kaichhawn theih hun vanglai niin an sawi a. A kai tam zawkte hi tlang hri lêng dang ang bawkin enkawlna hranpa ngai lem lovin ni 7-10 velah an dam ve leh mai thin a. Tu pawhin he natna hrik hi an kai theih rualin, a bikin naupang kum nga hnuai lam leh kum upa te, natna benvawn neiten an kai samin an la na deuh bik tih an sawi bawk.

Enkawlna hranpa a awm lem lo a, tlang hri leng pangngai enkawl anga enkawl thin niin khawsik a awm chuan Paracetamol ei a tha a, taksaa tui tlakchhamna (dehydrate) loh nan tuiril lam in tam a tha tih an sawi bawk.

Mizoram sawrkar chuan HMPV leng thei lakah ruahmanna chi hrang hrang a siam a. Health minister chairman-na hnuaiah he natna chungchang viltu tur ‘Core Committee on HMPV’ din nghal niin, state level-ah leh district tinah Rapid Response Team pawh a siam.

Health system leh Surveillance network in uluk leh fimkhur takin a vil reng tih sawiin, hrileng darh palh thutah pawh hma la vat thei turin Health Department chu a inring reng a. Sawrkar damdawi in leh private damdawi in zawng zawngten IHIP report hmanga ni tin hetiang ang case (ILI, SARI etc.) an neih leh natna dang report thin turte uluk leh kim taka report turin sawrkar chuan a hriattir a. Zoram Medical College (ZMC)-ah a test theih turin ruahmanna a siam bawk.

Mipuite he natna rinhlelh kai an awm a nih chuan mahni awmna atanga hnai ber Sub-centre/Health and Wellness Center-ah emaw, damdawi inah emaw in-report vat turin Health & Family Welfare Department chuan a chah.