Hripui leng chuan ziaawm lam a la pan thei lova, tun dinhmunah tak phei chuan a hluar ber lai kan tawng mek niin a lang. Veng/khaw tam tak chu inkharkhip puan a ni a, mitthi pawh an pung chak sawt hle. Hrikai hmuhchhuah te hi September thla ah pungin nitin 1000 chuang ni deuh ziah ta mai! Covid-19 hri hian sumdawngte pawh nasa takin a nghawng a ni.

Mizorama sumdawng pawl hrang hrang inzawmkhawm Mizoram Business Coordination Committee hruaitute chuan tunhnai khan Chief Minister Zoramthanga chu a pisa ah hmu in hrileng chuan nasa takin a nghawng nia sawiin an harsatna tawh te an thlen a. Chief Minister hian MBCC te hi an harsatna te ziaka thlen turin a lo hrilh a ni. ZALEN thudawn danin MBCC te hian Chief Minister hnenah hian CAB tha taka zawm chunga nitin dawr hawn tawh an duh thu te, lirthei intlanchhawk kalpui mek hi chhunzawm anih dawn chuan four wheeler ah number kawpkim leh kawpkim lo intlanchhawk nise, two wheeler erawh nitin tlan se, motor document leh a tul dang te renew theih hun chhung chu kumin kumtawp thleng pawhsei nise, kuthnathawk, huan thlai siam te ah inkhuah-khirhna siam ni tawh lo se, Covid vaccine full dose la tawh te contact tracing ah anlo tel palh anih pawhin home isolation/ quarantine tih ngei ngei ni tawh lo se tih te thlen an tum nia hriat a ni.

Dawr kai pakhat chuan kar khata ni 3 chauh dawr hawn phal a ni chu buaithlak a tih thu a sawi a. "Man chawi in mi dawr kan luah a, veivak an tlem nak alaia kar khata ni 3 chauh kan inhawn chuan kan dawr luah man tak ngial pawh hlawhchhuah zawh loh a hlauhawm a. Chuvangin sawrkar hian kan harsatna hria in ngaihtuahna thar min hman sak se ka duh hle a ni," a ti.

Motor hmanga sumdawng pakhat pawh-in tuna kalphung chu buaithlak a tih thu sawiin, "Kan hnathawkte hlawh hi a kimin kan pe lo thei si lova, chutih laiin kar khatah ni 3 chauh hna kan thawk thung si a. Hei mai ni lovin loan hmanga lirthei leitu ten a rulh kawngah harsatna an tawk bawk a, chuvangin kan kalphung hi chu thlak thei se ka duh hle a ni," a ti.

Nitin eichawp zuar nu pakhat chuan tuktin zing dar 10 thleng inhawn phal ni mahse harsatna nasa tak an tawk tih a sawi ve bawk a. "Kan inhawn hun chhung hi a reilo em mai a, inhralh tam a har hle a ni. Dawr lian zawkah bungrua kan lak te a ngai ve bawk si a, hei ai hian inhawn hun chhung hi rei deuh thei se ka duh hle a ni," a ti ve bawk.