Feature - Hripui karah zemawi

Admin - Jun 06, 2021

Kohhrante pawhin an mi leh sa thliar lovin a mamawhte hnenah an luang chhuak

Mi thiamten hri darh zel tur khuahkhirhna tha ber nia an hriat chu inkharkhip ‘lockdown’ a ni a. Covid-19 in min luhchilh thuk tawh em avangin hri khuah-khirhna atan April 20, 2021 atangin inkhuah-khirh puan a ni a; mahse, he inkhuahkhirhna ‘partial lockdown’ hian awmzia a nei thui lo nia a lan avangin May 10, 2021 atangin inkharkhip pumhlum ‘total lockdown’ puan a ni leh ta a ni.

A bik takin Aizawl khawpui chu hri hian a luhchilh thuk hle a, Aizawl khawpui veng hrang hrangah hri vei an awm deuh vek tawh a. Hriin a tihbuai zual veng an awm laiin buai lutuk hrih lo an awm bawk a, engpawh nise hri hian kan nun a tizalen lo va, ni danga thenawm khawveng inlenpawh leh chhungkhat lainate nena thiltihho ang chi pawh tih a rem ta lo.

Inkharkhip hian nghawng eng emaw zat a nei a, hri vei chhungkuate chu pawn chhuah phal loh ‘home quarantine’ an ni a. Covid-19 hri hmuh tamna veng pawh tlawhpawh theih loh hmun ‘containment area’ ah te puan a ni. Home quarantine te hian ei leh in, ni tin mamawh an nei a, an tan pawn chhuah theih a nih loh avangin tanpui an ngai a, heng hunah hian kan pipu atanga kan chhawmnun zel Zonun zemawi chu a lang chhuak zel a ni.

Tun hnaia hri kai tamna veng thenkhat chu thingtlang lam atangin phut let engmah nei lovin chawhmeh chi hrang hrang an pe a, hei mai ni lovin pawl leh mi mal thahnemngai ten ei tur leh ni tin mamawh chi hrang hrang an pe bawk. Kohhran, pawl leh mi mal thahnemngai mi eng emaw zatin mi harsa te tanpui nan Chief Ministers relief fund an pe bawk a. Veng hrang hranga LLTF-ten an veng chhungah harsa leh chhuanchham an awm ang tih hlauvin an mamawh chi hrang hrang an ngaihtuahsak a. Kohhrante pawhin an mi leh sa thliar lovin a mamawhte hnenah an luang chhuak bawk.

Home quarantine pakhat chuan, “Khung hran kan nih chhung khan mi tlawmngai hrang hrangten mamawh kan neih leh neih loh min zawt reng a, mi chi hrang hrangin ei tur min pe reng bawk a. Ni dang ai mahin chawhmehah kan hnianghnar zawk a, a ropui ka tiin kan Mizo nun zemawi hi a la ding reng tih chiang takin ka hria a ni,” tiin ZALEN a hrilh.

Veng pakhata LLTF hruaitu pawhin, “Mi thahnemngaiten phut let nei miah lovin mi harsate tanpui nan sum leh thildang min pe a, hei mai ni lovin mi tlawmngaiten hripui laka kan lo him nan duty an kalpui reng thei bawk a. Heng te hi hnam dangin an neih ve ka ring lo a, kan piputen ‘Sem sem dam dam, ei bil thi thi’ an lo tih thin kha a takin kan la nunpui reng niin ka hria a, a ropui ka ti khawp mai,” tiin a sawi bawk. 

Share now