DOWNLOAD OUR APP

Read latest news on your phone
app-store

Feature : In thlen hnu chauha hri hlau

Jun 20, 2021

Hripui hi kan hlau tak tak em? lo inzawt ve rawh

Hripuiin min nuai mek a, ni 60 kan in lockdown tawh chungin positive erawh nitin kan kiam chuang lo. Tih palh thil thuah kai chu  awm na meuh mai, fimkhur loh erawh a tam zawk. Hripui hi kan hlau tak tak em? lo inzawt ve rawh.

Mithiam ten hri laka atanga kan fihlimna tur nia an sawi hrang hrang mask vuah that, kut silfai ngun, midang nena inhnaih loh tur leh ina awm tam tur a tih te chu a thu chuan kan hria a, mahse a tak tak chuan mipui ten kan zawm lo hle. Khaw laiah han chhuak ila lirthei leh mihring an tei huai huai a, lockdown loh lai aiin tlemin a ziaawm hret niin a lang. 

Aizawl veng pakhata task force member chuan, "Nitin mai hian task force office-ah hian lehkha la hi mi 40/50 vel hi an awm reng mai a, heng mite hian thil pawimawh tak tak an chhuanlam vek a. Aizawlah hian veng 84 emaw a awm a, heng veng hrang hrang te pek khawm leh sawrkarin pisa kai ngei tura a tih te nen hi chuan tei huai huai tham hi kan awm a.  Lehkha tam tak hi chu pawimawh ti tur ni lem lova chhuah chak hrim hrim niin an lang," a ti a. Hei hian hri kan hlauh tak tak lohzia a entir nia a hriat thu a sawi.
 

Positive an awm a, a kaihhnawih inchhuina ah pawh chhuizui ngai hi an tam em em mai a. Hei hian ina kan tawm tam loh zia leh midang te nena kan la inkalpawhzia a lantir niin veng pakhata LLTF member chuan ZALEN a hrilh a. Fimkhurin Covid hi hlau tak tak ila chuan tuna ai hian vei an tlem zawk a rin thu a sawi bawk. 
   

"Thenawm khawveng te ina chuankai hi kan thulh duh lova. Kuhva leh sahdah intheh mai mai te kan la ching a, hei hian hri a thehdarh thei a. Sawrkar thupek hi chu zawm tha ila chuan heti khawp hian hri a darh ka ring lo a ni," tiin doctor pakhat chuan a ti bawk.
   

Bazar na leh dawra thil leina velah pawh hri kan hlau lo tih lan chian-na chu midang nena inhlatin kan awm duh lo a, kan la innek tulh tulh reng mai. Chhuahvahna ah mask kan vuah tha peih lo a, Police leh task force te hlauh vangin kan vuah vel mai mai niin a lang. Hei mai ni lovin containment erea atang te pawhin chhuak ru te an la awm duh zel a, hei hian hri kan hlauh lohzia a lan tir a. In a kan haw hnuah chauh Covid-19 hi kan hlau thar leh ni berin a lang. 

Share now