Kum 2017 atanga kalpui tan, Mizoram khawpui fai endik hna chu December 5, 2022 atang khan neih tan a ni leh tawh a. Fai lawmman hi kumthar lamah sem leh tura ruahman a ni.

Urban Development & Poverty Alleviation Department bultuma neih tur khawpui fai inelna hi Aizawl khawpui chhunga AMC Ward 17 te, district khawpui 10 bakah urban town 17 ah te neih leh a ni dawn a. Naktuk Thawhtanni atang hian district headquarters leh urban town ah te neih tan a ni ang a, khawpui fai leh fai loh endiktu turte chu team hnihah inthenin endik hna hi an thawk tan dawn a ni.

Kumin faina thupui atan hian ‘Vantlang inthiarna vawn fai’ tih chu thlan a ni a. Thupui (parameters) hrang hrang hmangin faina leh thianghlimna kawnga khaw hrang hrangte hmalaknate endik a ni dawn a ni.

Mizoram Cleanliness Competition 2022 hi August 1, 2022 khan bultan a ni a, online hmanga zawhna chi hrang hrangte chhantir tawh an niin a hmuna endik hna hi thawh tan a ni dawn ta a ni. 

Nikuma fai inelnaah AMC Ward fai berah Ward No. 17 thlan a ni a, district khawpui fai berah Saitual thlan niin urban town fai berah Biate thlan a ni. 

Mizoram hian fai kawngah nasa takin hma sawn bawk mah se national level-ah chuan a la sang lo hle a. National level-a endiktute hian tun kar hian Mizoram an rawn endik beisei a ni. 

Fai kawnga hmalatute sawi danin kawtlai phiahfai leh bawlhhlawh a bawma paihah te deuh chauh Mizoramin hma a sawn a, hetih lai hian bawlhhlawh thliar hran (segregation of waste) ah kan la titha tawk lo hle a, chu mai ni lovin kawr leh remchanga bawlhhlawh la paih mai mai an la tam hle.

Sawrkar laipui chuan India rama chhungkaw tin te chu pawna inthiar awmlohna ‘open defecation free’-ah siam a tum a. Mizorama khua zawng zawng chu ODF hi an ni vek tawh a. Sawrkar laipui chuan ODF hi duh tawk mai lovin hei aia sang open defecation free plus turin hma a la leh mek a, tun dinhmunah Bairabi khua chiah hi ODF plus khua awmchhuan a ni a. Bairabi khua hi August, 2022 khan open defecation free atan puan an ni.