Mizote hi kuhva ei nasa tak hnam kan ni a, mipui zatve aia tam mah hi kuhva ei kan ni hial awm e. Kuhva mana kan sum leh pai senso hi a tam tham hle mai a, mi thil chik mite chuan kuhva rah, panhnah leh chinai man atan hian kar tin nuai tel hi phai lamah a lut thla niin an sawi.

Kuhva hi India ramah chuan Kerela, Karnataka, Assam, Meghalaya leh West Bengal te hi a ching/thar tam state an ni a. Mizoramah chuan khawthlang leh hmar lamah an ching uar zual a, kuhva hian ram lum a ngeih niin an sawi a. Kum tin India hian kuhva rah ton maktaduai khat chuang a mamawh niin an sawi.

Kuhva hi hmanna chi hrang hrang a awm a, chung zingah chuan supari, gutkha leh rawng siamna te hi a lar zual an ni a. A bikin hmarchhak biala chengten an ei nasa hle bawk.

Mizoram tharchhuah kuhvate hi tunhma deuh chuan hnam dang sumdawngten an lei thin a, kuhva sen lai atang hian sumdawngte lo kalin an khar mai a. Kuhva huan enkawl leh a rah lawh thlengin an ti vek thin a; mahse, tun hnai kum nga kalta vel atang khan khawchhak lam atangin kuhva rah a lo lut a, man tlawm zawka hralh a nih avangin Mizoram kuhvate chu a hnawng tan ta a. Khawchhak kuhva chu Assam lamin an state paltlang an phal loh avangin Mizoram kuhvate pawhin a tuar ta a, kuthnathawktute an mangang hle a ni.

Sawrkar laipui pawhin khawchhak lam atanga kuhva lak luh chu a remti lo va, Mizoram sawrkar pawhin tihtawp tumin hma a la chungin tihtawp a harsa a, vawiin thlengin a rukin kuhva hi a la lut reng niin a lang.

Dan leh thupek kengkawhtute pawhin a khât tawkin man an la nei reng a. Khawchhak kuhva hi khawi atanga lo kal nge tih hriat a ni chiah lo nain Thailand, Malayasia leh Vietnam ram vela tharchhuah niin an sawi a, heta tang hian Burma kaltlangin Mizoramah phurhluh thin an ni a. Mizoram sawrkar kalta leh tuna sawrkarna fawng chelh mektute pawh hian tlawmngai pawlte nen tangrualin kuhva sumdawnna hi tihtawp tum thin mah se vawiin thleng hian a la tawp thei lo a ni.

Mizoram Legislative Assembly budget session neih zawh takah khan zawhna chhangin Home Minister K. Sapdanga chuan sawrkar tharah dan loa Mizorama kuhva tawlh ruk bag 2,868 man a ni tawh tih house a hrilh a ni.

Ministry of Commerce & Industry chuan July 25, 2018 khan thuchhuah siamin ram dang atanga kuhva lak luhna atan hian kuhva rah kg khat Rs. 251 aia tlawma lak luh a khap a. Hei bakah hian basic custom duty 40% leh GST 5% chawi a ngai bawk.

Dan ang thlapa lalut tur chuan kuhva kg-ah Rs. 730 vel a ni dawn niin mi thiamte chuan an sawi a; mahse, kuhva sumdawnna enkawltute hian chhiah hi an chawi loh avangin man tlawm takin an hralh theih phah a. Tun dinhmunah Aizawl market-ah kuhva rah hi kg ah Rs. 300-400 inkar a ni mek.

Mizoram sawrkara hna sang tak lo chelh tawh chuan sawrkarin kuhva lakluhna atana tax a bithliah hi a sang lutuk a, chuvang chuan a ruk (smuggling)-in a lut lo thei lo a. Kuhva hi tawlh luh a nih tho avangin chhiah lak hi tihniamin dan anga lakluh dan zawn nise tha zawka a hriat thu ZALEN a hrilh.