Kan pi leh pu atanga kuthnathawk mi kan ni a. Tunhma deuhin lo neiin ei kan zawng thin a, hun a lo kal zela loneih aiin huan siam chu a hlawk zawk avangin mi tam takin thlai an ching ta a. Kuthnathawk hlawhtling tak tak an awm ta nual mai, chung kuthnathawk hlawhtling zingah chuan Nalzawl khuaa mi Ramtinchawma hi a chhuanawm pawl a tling ngei ang.

Ramtinchawma hi a hma chuan Kawrte khuaah a awm thin a, Nalzawl khua atanga Bru (Tuikuk) mi eng emaw zat Tripura lama an tlanchhiat khan an ram neih ang ang te leisakin Oilpalm a ching tan a, tun dinhmunah oilpalm atang hian kumtin nuai 12 atanga 16 inkar a lalut thin a ni.

Zalen palai zawhna chhangin Ramtinchawma chuan tun dinhmunah oilpalm hi kung 4500 vel a nei tih sawiin a remchang angin a phunbelh zel niin a sawi a. Oilplam chin chu a tih chi hle nia sawiin kumtluanin a rah a, a rah bawr khat pawh kgs 40 te a tlin theih avangin a hlawk hle niin a sawi. Oilpalm chu kumtluanin a rah a, thalah erawh tui duhkhawp a hmuh loh avangin a rah chhe deuh thung.

Oilpalm phurh chhuah kawngah erawh harsatna an nei tih sawiin a lakkhawmna hmun (collection centre) chu khua atanga km 8 laia hlaah a awm avang te, fur ah chuan kawng a chhiat thin avangin an phur thei lo a, hei vang hian an duh angin an hralh thei lo tih a sawi. Oilpalm leitu Godrej Company chuan an hralhna sum chu Account lamah an thun tha hle nia sawiin an hralh atanga ni 15-20 inkarah an hralhna sum chu a lut thin niin a sawi bawk. Mizoram sawrkarin Oilpalm chingtute hnena support price kg khatah Re. 1 a pek thin chu tisangin state dangten Rs.3 an pek ang chu pe ve se kuthnathawktute chu an hlawk lehzual dawn niin a sawi bawk.

Ramtinchawma hian oilpalm mai bakah sangha dil pawh a nei tha hle a, a dil atang hian nikum lam khan sangha quintal 125 a thar tih sawiin kumin hian quintal 200 vel thar a beisei niin Zalen palai a hrilh bawk a. Mizorama sangha tharchhuak tam ber nia hriat a ni.