Kum khat a liam hnuah pawh hripui chuan  min la chamchilh a, mipui khawsak a buai a, he hripui hi lirtheia eizawng te chuan an tuar hle.

Aizawl khawpuia taxi khalhtu pakhat chuan ni dang angin passenger an tam loh avangin tlan tam a har hle niin ZALEN a hrilh a. "Tunkar chho phei hi chu Aizawl veng engemaw zatah inkharkhip an puan avang leh hrikai an pun tam em avang hian mipui pawn chhuak an tlem a. A chang chuan petrol man daih emaw chauh te hi kan hawn thin a ni," a ti.

Taxi neitu pakhat chuan an lirthei chu loan hmanga an lei anih avang te, driver te chu hlawh pek ve reng an ngaih ve bawk si avangin a mangan thu a sawi ve bawk.

Maxicab driver pakhat chuan tlemin an ziaawm chho ve hret hret nia a hriat thu a sawi a. "Loh theih lohna avangin hun engemaw chen kan tlan thei lova, tunah erawh chuan mipui pawhin he hri hi an pawm thiam tan chhovin ka hria a. Kan ziaawm chho ve hret hret turah ka ngai," tiin a sawi ve bawk. ` State danga khualzin te phurtu, maxicab counter nghaktu nu pakhat chuan inkharkhip zualpui a reh hnu hian state danga kal tur te chu an awm chho tan niin a sawi a. 

"State thenkhatah hian zirna in te an hawng leh tan ta a, zirlai engemaw zat chu an zirna chhunzawm turin an kal leh tan tawh a. Kar leh lam te hi chuan mi tam zawk an kal chhunzawm leh kan beisei a, keini pawhin dan pangngaia service leh thuai theih kan beisei a ni," a ti a. Inkharkhip lai chuan zin tur an awm tlem avangin maxicab pawh an tlan mang lo niin a sawi bawk.   

Aizawl city bus neitu pakhat chuan sawrkarin tlan phal mahse passenger an tam lotih sawiin "Mipui pawnchhuak an tlem avang leh bus a inhnawh an hreh avang hian service pawhin awmzia a nei thui lo hle a ni," a ti ve bawk.

Two wheeler taxi khalhtu pawhin service loh ngawt aiah a tlan vel mai mai niin a sawi ve bawk a. "Mipui veivak hi an la tlem hrim hrim bakah lirthei a chuan hi an hreh niin ka hria a, tlanna tur hi a tlem thei khawp mai," tiin ZALEN a hrilh bawk.