Mizoram sawrkar chuan hun rei tak a lo kalpui tawh total lockdown chu tunkar chho hian thlahdul a ni dawn a, chutihrual chuan inkaihruaina khauh tak erawh siam ngei a tum. Lockdown thlahdul tur chungchangah hian political party leh NGO lam chuan tha an tih rualin sawrkar chu tih tur hmabak la ngah hle-ah an ngai hlawm.

Central YMA president Vanlalruata chuan thlahdul huk tha an tih loh thu a sawi a, chutihrualin mi tam tak sumdawnnain a tawrh tawh avangin eng emaw chen thlahdul chu tul tawha an ngai a, SOP khauh tak erawh siam ngei tul a tih thu leh a awm ngei turah a ngai bawk. Covid hi a vanglai tak a la nih avangin lockdown hi a lehlam taka chuan thlahdul a la hun lova an ngaih thu leh mipui te chu fimkhur taka awm zel turin a chah.

Indian Medical Association lam chuan Medical Operation Team-a tel a nih angin lockdown hi thlahdul huna an ngaih thu ZALEN an hrilh a, inthlahdul hret hret chu huna an hriat tawh thu leh testing lamah chak taka hmalak tul an tih thu an sawi.

MPYCC thupuangtu Lallianchhunga chuan Lockdown hi mipuiin an thlawp tha hle-ah a ngai a, sawrkar lam chu SOP kengkawh tha lovah a puh. Economy chhe taka awm theih kan nih avangin lockdown thladul chu a tha mai tawh niin a hria. Sawrkar hian inkharkhip hi a duh leh a nih chuan state budget atangin sum ruahmanna siam se an duh tih a sawi. CYMA in NGO leh all party meeting a koh tuma thutlukna an siam BPL te tui leh electric awltir chungchang pawh sawrkar hian a la ngaihtuah loh thu a sawi lang tel. 

ZPM Secretary General PC Vanlalruata chuan an party chuan pawngpaw inthlahdul chu an la duh loh thu a sawi a, chutih rualin chhuanchham an tam tawh avangin lockdown reng chu thil ni thei niin a hriat loh thu leh hna thawk theia insiam tul an ti. Zalen taka awm thei kan la ni lo a ti a, Covid dedicate hospital tura an ruahman pathum te pawh ruahmanna mumal a la awm lo niin a sawi a, mass testing a hmanhmawh theih bawk si loh avangin mipui te fimkhur taka awm tula a hriat thu a sawi.