Kum nga dana neih thin India ram inthlanpui, Lok Sabha election chu April 19, 2024 atangin neih a ni dawn a. Election Commission of India ruahman dan chuan Lok Sabha 18-na siam tura inthlanpui hi hi chhawng sariha neih tur a ni dawn a. Thawh khatna hi April 19-ah vote thlak a ni ang a, thawh hnihna hi April 26, thawh thumna hi May 7, thawh lina May 13, thawh ngana May 20, thawh rukna May 25 leh a hnuhnung ber thawh sarihna hi June 1-ah te neih a ni dawn a. Vote tlate hi a rualin June 4, 2024-ah chhiar a ni ang a. Mizoram chu a thawh khatna April 19, 2024 (Zirtawpni)-ah vote kan thlak dawn a ni.

Tun tum Lok Sabha inthlanpui lo awm turah hian Lok Sabha MP 545 awm thei zinga 543-ah mipuiten an aiawh tur an thlang dawn a, seat hnih hi India president-in a ruat dawn a ni.

Khawvela democracy ram lian bera mipui aiawh thlan turah hian ram pumah voter maktaduai 968-ten an aiawh tur an thlang dawn a. India ram state zingah Uttar Pradesh chu MP ngah ber niin 80 an nei a, a dawttu Maharastra-in MP 48 leh West Bengal 42 neiten an dawt a ni.

MP inthlan lo awm turah hian sawrkar laipuia rorel mek BJP kaihhruai NDA leh Congress kaihhruai INDIA te chu inbei ber tur an ni.

Kum 2019-a Lok Sabha MP inthlanah khan Mizorama seat khat awm chhun chu mi parukin an chuh a, chungte chu C.Lalrosanga (MNF), Lalnghinglova Hmar (Independent), Nirupam Chakma (BJP), TBC Lalvenchhunga (PRISM), Lal Hriatrenga Chhangte (Independent) leh Lalthlamuani (Independent) te an ni.

Mi paruk zingah hian MNF candidate C.Lalrosanga chuan vote 2,24,286 hmuin thlan tlin a ni a, amah hnaih bertu, independent candidate Lalnghinglova Hmar chuan vote 2,16,146 hmuin an inthlauhna hi vote 8,140 a ni.

Mizoram hian Lok Sabha MP hi mi paruk a nei tawh a, chungte chu R. Rothuama, independent (1977 & 1980); Dr. C.Silvera, INC (1989, 1991 & 1986); Dr. H.Lallungmuana, independent (1998); Vanlalzawma, independent & MNF (1999 & 2004); CL Ruala INC (2009 & 2014) leh C.Lalrosanga, MNF (2019) te an ni

Tun tum Lok Sabha inthlan lo awm turah hian Mizoram pumah voter 8,61,277 an awm dawn a, heng zingah hian mipa 4,14,777, hmeichhia 4,41,520 leh service voter 4,980 an ni a. Vote nei tamna ber district chu Aizawl niin 2,88,268 an awm a, an tlemna ber district chu Hnahthial niin 16,257 an awm a ni.

Vote nei tamna ber assembly constituency chu 36-Tuichawng, Lawngtlai district niin voter 36,493 an awm a, a tlemna ber assembly constituency chu 34-Thorang, Lunglei district niin voter 15,152 an awm a ni.