FEATURE : Mahni hmun lam panin

Admin - Oct 10, 2021

Zirlai ten an awmna thin an pan khawm mek

Hripui vangin Mizoram atanga state danga hnathawk leh lehkha zira awmten  Mizoram an pan khawm a, mahse tunhnaiah hri hian ziaawm lam a pan ta deuh nia a lan avangin hna thawk leh zirlai te chuan an awmna thin an pankhawm leh mek.

Nikum hrilen tirha Mizoram sawrkarin state danga tangkhang te buaipui tura a ruat 'task group on migrant workers and stranded travellers' chhinchhiah danin India ram state leh UT 32 a Mizo tangkhang hi mi 5,546 an ni a, an zinga mi 3,194 chu inhlawh an ni a, mi 2,103 chu zirlai niin damlo inenkawl mek 249 an awm bawk.                 Tangkhang zingah hian Maharastra state a awm tam berin 863 an awm a, Meghalaya chuan dawtin 742 an awm a ni.

Covid-19 vaccine pekchhuah tam anih tak avang leh hrileng in ziaawm lam a pan tan nia a lan avangin state danga hnathawk leh zirlaite pawhin an hmun an pan tan chho mek. State pawna Mizo zirlai awm tamna ber nia hriat Shillong-ah chuan college hrang hrangin off line class kalpui an tum tan avangin zirlaite pawh Meghalaya panin an kalkhawm tan mek a, puja zawh hi chuan regular taka class kal an tum nia thudawn a ni.

Mizo thalai hna thawka awm tamna pawl Goa state ah pawh hrilengin ziaawm lam a pan tak avangin thalai hnathawk te an let thla leh mek a. 

Goa Mizo Welfare President Janette Lalkhumi chuan tunhnaiah mi 200 vel an lo let tawh niin Zalen a hrilh. Janette Lalkhumi chuan, “Hripui avang hian nikum lamah mi 800 vel an haw niin kan hria a, mahse hetih lai hian haw lo pawh mi engemaw zat an awm a. Heng mite hi an thawhnaten inkharkhip chhung pawh hian hlawh mumal takin an pe a ni,” a ti.

Goa Mizo Welfare hruaitute chuan October thla tir atangin puipun na hmun te hawn anih tak avangin Mizoram atang pawhin an hna ngai thawk leh tur mi eng emaw zat chu an lo chhuk tawh nia sawiin thawk thar turte erawh an la chhuk lo nia an hriat thu an sawi.

Bangalore Mizo Association President Jim Lalrammawia pawhin zirlai leh hnathawk a awm thin te chu an lo let nual tawh niin a sawi a. "Hna pawh dan pangngaiin a kal leh tan tawh a, college pawh an tan fur tawh avangin an lo let hnem tawh hle," a ti. New Delhi a Mizo Welfare hruaitute chuan hnathawk tura let chu awm bawk mahse zirlaite erawh let an la tam lo niin an sawi a. "Company thenkhat chuan hna an tan tawh chungin a hma ang chu a la ni lo a. College pawh online hmanga an la tih loh avangin zirlai lo let pawh an la tam vak lo a. Mahse offline class neih an tum hnai nia a lan avangin an lo chhuk tan niin kan hria," an ti bawk.

Share now