Europe khawmualpui football inelna lian Euro 2020 chu khelh mek a ni a, 
heitih lai hian South America khawmualpui ram ten Copa America an khel ve 
mek bawk. Mizoram-ah chuan Sony Ten Sports kaltlangin heng inkhel te hi 
kan en thin a, inkhelh hma, inkhelh chawlh lai leh inkhelh banah te inkhelh 
chungchang an sawi thin. Mizoramah-ah pawh cable TV pahnih LPS leh 
Zonet-ah te sawihona neih thin a ni a, an sawi ngaihnawmin Mizo football 
expert kan neih ten fak an phu ngawih ngawih.

Sony Ten Sports lamah hian India footballer mai bakah football 
khawvela sulhnu nei tha tak tak te thu leh hla ngaihthlak tur a awm thin a, a 
hmuna entu ngei te comment thlengin tihchhuah thin a ni a, a en thin tan 
chuan a bengvarthlak tak zet hlawm. Mizoram lama kan football expert te 
pawh hian zan tir lama inkhelh hma leh inkhelh chawlh lai leh inkhelh pahnih 
kar lakah te an sawiho thin bawk a, TV channel lian zawk te tehkhin pawhin an 
chhuanawm hle.

 Kan cable TV lian pahnih ten football game an thlir lawk leh an sawi 
zui kawngah Zonet cable lam hian an tichangtlung zawk deuh a tih ngam a, 
panel te insiamin inkhel an sawiho a, LPS lam thung hi chuan studio lam 
atangin an khaikhawm thin a, software chi khat hmangin ral khatah hun an 
hmang thin. Heng sawihona thlir thintu pakhat chuan, "Football history leh 
player dinhmun chu an hre khawpin ka hria, inkhel hrim hrim technical taka an 
lo thlir lawk dan atang pawh hian thil an chik tih a hriat. Sony sports lama 
sawihona hmangtu te ai hian an that lohna bik ka hre chuang lo," tiin a sawi.

Zonet lama sawihona thlir pawhin, "Technical ngawr ngawr lo sawi 
tur an hre em em a, a nihna takah phei chuan football lama tui lem lo tan 
pawh ngaihnawm deuh deuh hriat tur a tam thin. Tin, football piah lama inkhel 
ram te history te lamin an hre viau zel hian an thusawi ngaihthlak a ti man hla 
a. Sony sports lama sawi Indian footballer te ai hi chuan hriat pawh an hriat 
ka ring fe zawk," tiin a sawi ve bawk.

An sawi ang deuh hian kan cable TV lama sawitu te hi football mai 
piah lamah nitina chanchinbu leh social media lama sports leh a kaihhnawih 
ziak thin te an ni hlawm a, a zawttu lam pawh chutiang lama hre tak leh 
belhchhian dawl tak tak te an nih hlawm avangin belh chhian pawh an dawl 
hle. Tin, Zonet lam hian Mizo footballer hlawhtling te ngaihdan mai piah lamah 
football lam mi leh sa ni lem lo te ngaihdan te lakhawmin chak zawk te an rin 
tir thin bawk a, hei hian Euro leh Copa football boruak mi tam tak a chentir a 
tih theih bawk ang.