Feature : Mizote leh kan chawhmeh

Admin - Jul 17, 2021

Kan tunlai hmeh nen chuan a danglam te hle

Hun inher zelah kan ei leh in lam pawh Mizote hian kan duhtui ta hle. Khawvel hmun hrang hrangah kan inzar pharh nasa ta hle tih pawh kan ei leh in siam dan atangin a chiang thawkhat hle. 

Facebook a ni emaw, YouTube lamah pawh Mizote ngeiin hnam dang chawhmeh siam angte pawh zir lem lovin kan siam thiam ve zel tawh. Chutihrualin Mizote hian kan chhulchhuak chawhmeh bik sawi tur chin hi eng nge kan neih tih leh eng bawlhlote hi nge tunhma lamah kan lo hman thin tih pawh hi hriat tel a tha ve khawp mai.

Mizote hian chawhmeh atan hian eng nge kan hman thin a, a siam nan eng hmanrua nge tunhma lam khan kan lo hman thin, tih ngaihtuah te hian tunlaia kan chawhmeh tam ber hi chu kum 200 vel kalta lamah kha chuan kan hmeh ngai miah lohte a ni ngei ang.

Youtube lamah leh social media hrang hrangah chawhmeh siam chhawpchhuah leh hmuhnawm tura thil ei lai tam tak hmuh tur a awm a; mahse, heng chhawhmehho zingah hian kan chhulchhuak chawhmeh siam dana siam hi chu a lang tam lo khawp mai. Bai leh bawl hi kan thehchhuah deuh ni maiin a lang.

Mizote hian um lam hi kan tih mi ve deuh niin a lang, saum bakah ai-um leh vekang um hi hmanlai atanga kan neihte an ni a, um piah lamah hian chingal hi kan hman rim tak a ni bawk. Chawhmeh kan lamah hian tunhma lam atanga bawlhlo kan neih chu - aieng, sawhthing leh purun hi a ni mai awm e. ZALEN-in a zawh kum upa lamte chuan tun hma lamah phei kha chuan sahriak (tel) pawh vawk thau leh sa dang thau erte kha a nih mai thu an sawi a, kan lam kha chu kan ei tam vak loh a nih hmel.

Rep lam hi Mizote hian thil dah that nan bera kan hman chu niin a lang a, sa piah lamah thlai chi hrang hrang - antam, behlawi, hmarcha, anthur leh dawlrep te an uar hle a, an chawhmeh dah that dan chi khat niin, be lamah bete leh bekang bakah behliang mu dah thatte chu an tih makmawh a ni a.  An hmawmsawm neih tlanglawn puakzo leh faisa kanpuah tur dah that leh chawhchhi fai kawlte pawh an nuna bet tlat a ni. 

Kum upa lam ZALEN in a kawm te chuan an hriat chinah chhum an ei nasa tih an sawi a, sa pawh chhum chu hmeh dan ber a nih thu leh a hringa chhum a nih loh chuan a rep chhum a nih mai thu an sawi tlangpui hlawm. 

Kan lam an ei tam lo tlang hle a, vawk talh tur neiten a thau leh a hlap an er te chu tunhma deuh tak taka hriak an neihte a nih avangin kan hi ei a khat hle tih chu an sawi dan a ni hlawm. Sa a nih loh chuan bete chhum te chu chawhmeh tha tak a nih thin thu an sawi a, a bak chu bawl, bai leh tlak a ni mai thin a, bai pawh Saum nen an bai zen zen ngai loh a nih hmel. 

Heng chawhmeh leh bawlhlo kan neihte thlir hian kan tunlai chawhmeh hi chu a inang ta lo hle tih a lang reng mai a, chutih rualin sa chhum tawp erawh hi chu kan la ching chhunzawm zel thung. Saum leh chingal hmanga thil kan bawl leh kan baite hi hnam dangin an neih ve loh Mizoten kan puala chawhmeh siam dan bik kan neih chhun ni ta berin a lang a. Vawksa leh sanghal thau hmanga kan siam Saum hi chu kan chhehvel hnam dang pawhin an neih ve miah loh a nih hmel.

Share now