Hachhek biala kuhva chingtuten Myanmar kuhva ro vanga harsatna nasa tak an tawh mek laiin, Bilkhawthlir leh Vairengte lama chingtute pawhin state pawna kuhva hralhna kawngah harsatna an tawk mek bawk a, duty insiamin Myanmar kuhva ro che vel khuahkhirh ngei tumin hmalakna an kalpui mek. 

Dan loa lak luh kuhva rah phurten Bilkhawthlir an paltlang lohna turin Kuhva Chingtu Cooperative Society Ltd., (KCCS), Bilkhawthlir chuan chhun leh zanah an duty mek a. Hetihlai hian Vairengte Kuhva Ching Co-operative Society (VKCCS) pawhin Vairengte area-a kuhva dah kudam neitute chu kumthar January ral hma ngeia insenghawi vek turin an hriattir.

VKCCCS chuan tun hnai khan General Body meeting neiin resolution an siam a, Vairengte huam chhung kudam hrang hranga dan lova Myanmar atanga lo lut kuhva ro awmte chu January, 2023 thla ral hma ngeia senghawi vek turin a neitute an hriattir a. An senghawi lo a nih chuan harsatna leh buaina an lo tawk a nih pawhin mawh an phurh loh tur thu an tar lang. Vairengte-ah hian kuhva huan nei mi 300 vel an awm mek nia thudawn a ni.

KCCS, Bilkhawthlir pawhin an khaw paltlang tur Burma kuhva dangin chhun leh zan (24×7) duty-in nimin kha ni nga an duty-na a ni tawh a. Duty turin kuhva huan nei atangin detailment siam a ni a, ni khatah mi 20 zel duty an awm thin.

Hetihlai hian Bilkhawthlira kuhva kudam pangate chu a neituten an tiruak vek tawh nia thudawn a ni.

Bilkhawthlirah hian chhungkua 1,100 vel an awm a, chung zinga chhungkua 800 vel chu kuhva ching an ni a. Kumina kuhva rah an tharte chu vaiin an lei vek tawh a; mahse, state pawnah an phur chhuak thei lo thung.