Sawrkar laipui chuan kum tin naupang huaisen chawimawina hun a hmang thin a. Heng naupang huaisente hi Republic Day (January 26)-ah President-in chawimawina a hlan thin a, naupang huaisente hi Republic Day lawmna pui ber, New Delhi-a neihah sai chungah chuantir thin an ni.

Hriat theih chinah naupang huaisen lawmman hi Mizoram atangin mi 40-in an dawng tawh a, an zinga 13 hi thih hnua dawng an ni.

Kum tin India ramah naupang 25-te huaisen lawmman dawng tur hian thlan thin an ni a, nikum khan Mizo naupang pali chu huaisen lawmman dawng tur hian thlan an ni a. Heng naupang huaisente hian New Delhi-ah lawmman hi an dawng a ni.

Kuminah hian India sawrkarin mi huaisen chawimawina a hlan thin zinga mi Sarvottam Jeevan Raksha Padak 2023 dawng turin Anthony Vanmawia (11), Tuirial Tlangveng chu thlan a ni a. He lawmman hi Zirtawpni kalta khan Anthony Vanmawia pi leh pu hnenah Aizawl DC Lalhriatpuia chuan a hlan a. Huaisen lawmman atan hian pawisa fai cheng nuai 2, thuziak leh medal hlan a ni.

Lawmman hlannaah hian thu sawiin DC Lalhriatpuia chuan mi dang chhan nana Anthony-a hnathawh chu ropui a tih thu a sawi a. Naupang huaisen lawmman dawn zinga a sang ber, Sarvottam Jeevan Raksha Padak Award, 2023 hlan a ni.

Anthony Vanmawia leh a nau, Lalhmunsiama (9) te hi April 17, 2023 khan tlaia an school bâng chu khaw lum lutuk avangin tuia inchiah dai turin Tuirial luiah an kal a. Lui hnar lam, lei atanga km 1 vela hla, Pachuau Li-ah a nau chu tui thuk lai, tlema livir awmah a che buai a. Anthony Vanmawia hian theihtawp chhuahin a nau hi a chhanchhuak ta a; amaherawhchu, vanduaithlak takin a nunna hlu tak a chân ta a ni. An unau hi a pi leh pu in an enkawl mek.

Tuirial VCP Zohmingthanga chuan Anthony Vanmawia thih dan chu khawtlangin an chhuang tak zet tih a sawi a. Huaisen lawmman a dawn theihna atana buaipuitu zawng zawng chungah lawmthu a sawi a. Tuirial YMA hruaitute pawhin Anthony Vanmawia’n huaisen lawmman a dawn theihna atana thawktute hnenah lawmthu an sawi bawk.

Naupang huaisen chawimawina hi chi hrang hrang a awm a, chung zingah chuan Sarvottam Jeevan Raksha Padak hi a sang bera ngaih niin mi dang dinhmun hlauhawma dingte chhanchhuaktute hnenah pek thin a ni a. Hei bakah hian huaisen lawmman dang, Uttam Jeevan Raksha Padak leh Jeevan Raksha Padak te a la awm leh.

Kumin Republic Day puala chawimawina hrang hrang dawng tur an puan zingah Sarvottam Jeevan Raksha Padak Awardee mi pathum an awm a. Anthony Vanmawia bakah hian Mizoram atang thovin Melody Lalremruati a tel bawk.

India rama National Bravery Awards hmasa ber chu February 4, 1958 khan khatih laia prime minister, Jawahar Lal Nehru-a’n a hlan a ni.