Mizoram leh Assam ramri buaina chuan nghawng a la nei chho zel a. Social 
media lamah ‘Assam lamin Mizorama lut tur thlai ah tur an telh avangin fimkhur 
tur’ tih te, ‘Sangha ei a him lo’ tih leh thil dang eng eng emaw a darh nual avang 
in mipui pawh a ti chiai a. Health department chuan Assam atanga thlai lo lut te 
enfiah turin Rengtekawn, Kolasib ah Mobile Food Testing Laboratory a dah phah 
hial.

Eitur him leh him loh lam buaipuitu Food & Drugs Administration a 
Joint Director Lalsawma Pachuau chuan phai lam atanga thlai lo lut te a him lo 
tia mipui ten an sawi avangin Kolasib-ah thlai lo lutte lo enfiah turin an naute an tir 
tih ZALEN a hrilh a. “Kan test ang a, mipui tana a him leh him loh chu a hriat mai 
dawn a ni,” a ti. 

A ngaihdan sawiin, “Assam lama thlai chingtute hian Mizoram hi kum 
khuaa an eizawnna hmun tur a ni a, Mizote tih chhiat vek duhna rilru hi chu an pu 
dawn em ni aw ka ti deuh a ni,” a ti bawk.

Aizawl khawpui veng pakhata chawhmeh zuar chuan tunlai hian phai 
lam atanga chawhmeh lo lut chu hralh a har niin a sawi a. “Social media lama 
thu vawrh darh vang kha nge ni, ni danga min dawr thintute pawhin phai lam 
chawhmeh chu an iai tlat mai a, hralh a har deuh avangin ka la tam ngam lo a ni,” 
a ti a. Tunlai chu thlai hnah leh rah tam hunlai anih bawk avangin phai 
chawhmeh tel lo pawha zawrh tur a ngah tawk thu a sawi bawk.

Nu pakhat pawhin tunlaia sawi neuh neuh awm chu a tha zawnga Mizo 
mipuite tiharhtu ni se a duh tih a sawi ve bawk a. “Mizoten huan leh lo atanga kan 
thlaitharte hi a thianghlim a, phai atanga thlai lokal e aiin a thar tha zawk bawk a. 
Phai atanga lokalte hi chu lei tihthatna leh eng eng emaw te hi an pawlh ni hian a 
lang bawk a. Chuvangin, tuna kan hun tawn hi intodelh nan hman tum ila ka duh 
khawp mai,” tiin a sawi ve bawk.

Mizoramah thlai thar hunlai anih avangin kan intodelh hrih a, hei vang 
hian chawhmeh lakluh hi a tam lem lo. Phai atang hian tunlaia Mizorama lut tam 
berte chu alu, tomato, zikhlum, changkha leh carrot te nia hriat a ni.