FEATURE : Pian tlem a hlauhawm
![](https://zalen.s3.ap-south-1.amazonaws.com/images/news/1721476762_blog_161310234.jpg)
Kan pi leh pute kha chhungkaw rual ngaisang an ni a. Ram hnathawk an nih avangin chhungkaw rual chuan hna an thawk hlawk a; chuvangin, fa a tam thei ang ber neih an tum thin. Lal pawhin mi leh sa neih tam an duh a, lal ropui tehna pawh khua leh tui nghahah a ni chawk. Mahse, tunlaiah erawh chuan nu leh paten fa neih tlem an intihhmuh emaw tih mai turin a kum telin nau piang an tlem tial tial a, hetiang zel a nih chuan mi thiamte chuan Mizo hnam tan hian a hlauhawm thei dawn niin an ngai.
Mi thiamte chhut dan chuan hmeichhia (nu)-in fa pahnih tal an hrin hian mihring zat hi a dikin hnam tan pawh a him thawkhatah an ngai a, fa pahnih aia tlem an neih zel chuan hnam an la ral dawn tihnaah an ngai.
Economics & Statistics department-in kum tin annual report an tihchhuahah chuan a kum telin nau piang chawhrual hi an tlem hret hret niin a lang a, hetiang zela kan kal chuan a la hlauhawm thei dawn niin mi thil chik mite chuan an ngai.
Kum 10 dana chhiarpui neih thin atanga a lan danin nau piang hi kan pung lo hle tih a lang a, hetih lai hian Mizoram chhunga khawsa hnam dang erawh an punna (birth rate) hi a pung thung.
Aizawl veng pakhata Presbyterian kohhran inchhiarna atanga a lan danin dan zawh kim hian pun lam pan lovin a ngaiah emaw, a chang chuan kum hmasa lam emaw phak loh changte a awm hial.
Pian pun dan tura mi thiamten a him chin nia an ngaih phak zo lova an tlem zel hian chhan a nei a. Chung zingah chuan eizawnna avang te, family planning kalpui that vang te, nupui pasal inneih har vang leh in luah tur chungchanga harsatna thleng thin vangte niin an ngai.
Tunlaiah mi tam tak chuan eizawnna leh hna thawh tur a vân tawh avangin fa neih tam an duh tawh lo a. Hei bakah hian thawkkhat laia sawrkar laipuiin family planning a kalpui chu Mizoten fa an neih tlem phah a. Hman laia kum 16/17 vel leka nupui palsal innei thin kha tunlai hunah chuan kum 30 hnu lamah te nupui pasal kan innei a, fa nei tam turin a har tawh thin. Chu mai bakah Aizawl khawpuiah ngat phei chuan mi inluaha khawsa a tam zawk an ni a, inluah tur neiten chhungkaw rual chu inluah atan an duh loh thin bakah nula/tlangval fa neih tum lo/ kawppui neih tum lo an pun chhoh vangin nau piang zat hi a tlahniam ta nia ngaih a ni.
Hetia nau piang a tlakhniam lai hian thihna thleng (death rate) erawh a pangngai deuh reng a. Kum tin mai nau piang zingah hmeichhia aia mipa an tam deuh zel laiin thi zingah mipa an tam zel a, mipa thite hi a tlangpuiin zu leh ruihhlo kaihhnawih a ni tlangpui bawk a. Mizo zingah hmeithai leh pasal sun an pung nasa a, hetiang zel a nih chuan Mizo hnam hian ral lam a pan zel mai ang tih a hlauhawm niin doctor pakhat chuan Zalen a hrilh.
Doctor pakhat chuan Europe ram tam takah fa an neih tlem avangin an pung thei lo va, hetih lai hian Africa leh Mosolman ramten fa an nei teuh teuh mai bawk si a. Tun ang zela an kal chuan nakin lawkah chuan heng mite hian an ram hi an la luahsak mai dawn niin a sawi.
Mi thiamten hmeichhe pakhatin fa pahnih aia tlem lo an neih hian hnam tan a him nia an ngaih laiin Mizorama kan pun dan fertility rate (TFR) chu 1.9 chauh a ni tiin piang pung tura hma kan lak loh chuan kan la ral ngei dawn niin a sawi a. Mizoram chu hmarchhak state zingah Sikkim tih loa nau piang tlemna ber a ni tiin tan lak a tul thu a sawi bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024