Ral hmaa tlanchhe lo Rinmawii thlalak chu Mizo nula leh tlangval tam takin an kawr hmaah an chhukai tawh a, facebook leh social media dangah a thlalak hmuh tur a tam hle. Cuba tana beitu Argentine tlangval Che Guevara thlalak fashion khawvela a lar ang em chu ni lo mah se, Rinmawii huaisenna hian fak mai piah lamah ngaihsan a hlawh tih a chiang.

Vairengte-ah kum 10 vel chiah chiah a awm tawh a, tun hnaia Assam-in Mizoram chuha silai an hmehpuah tuma a chet dan avangin hmun tina Mizo te hriat a hlawh. A chet dan avangin thalaite tan tlanchhiat a thiang lo a, dawihzep theih a ni lo, Assam police dang turin a theihtawp a chhuah a; Pitar huaisen, a awmna veng ten Lalpi-i tia an koh, Lalrinmawii chuan a dinhmun a ngaihtuahin Pathian that zia a theihnghilh ngai loh thu a sawi.

Nu leh pa kara selian a ni lo a, a pa Zakapa Chhakchhuak hi Leisen khawchhuak niin a dam pui rei lo a, a nu hian tulpuiin a pute thlazar hnuaiah an nufa hian an khawsa thin. Champhai Zotlang chhuak niin, he hmunah hian a pu te ho  pawh an la khawsa hlawm. Pu te bula awm annih avangin a pa chhung te lam a hre thui loh tih tarlan a duh a, a pa farnu hi Zemabawk-ah a la dam tih a sawi tel.

Vairengte-ah hian chawhmeh la in a kal fo thin a, chumi hnuah a inbengbel zui ta tih ZALEN a hrilh a, tun boruak avang hian a hma lama a hriat lem loh a thisen zawmpui te pawh a zuk chharchhuak zui ta zel. A thisen zawmpui ni lem lo laina erawh a hma pawhin a lo ngah tawh a, tuna a awmna ram neitu Upa. R. Lalchungnunga nen pawh hian thisen lamah chuan inkungkaihna an nei hran lo.

Inkah lai khan sipai ho kiangah khan i awm ve si a, silai mu khan i bul hnai te a rawn deng em? tia ZALEN zawhna chu awlsam zet hian, "Kan chunga Lamkhuang hnah kha a tla ur ur a, silai thawm kha a ri char char bawk a, a bak chu han sawi vak ngaihna pawh a awm lo," tiin a chhang.

Kum 54 mi ni ve tawh Rinmawii chuan, "Lehlamin silai an rawn kap tawh si. Bawk ru bawk ru ka ti a, kan bawk rawk     rawk a. Min kap tawh si, keini lamin kan la kap ve mai si lo kha chu ka au/ang nasa khawp mai. 'In kap dawn lo a mi, ka pawnfen hi in feng mai dawn a mi ?' te kha ka tih khum a. Mahse, thupek awm hma loh kha chu an lo kap thei lo kha a lo ni a, thupek an hmuh chinah kha chuan kan police te kha an lo ropuiin an lo huaisen khawp mai," tiin ZALEN a hrilh.

Rinmawii hian kha inkahna boruakah kha chuan a thih loh a rin loh thu leh Pathian venna liau liau a nih thu a sawi. A nun kawng hrim hrimah Pathian hian thil ropui tak tak a tih sak thin avangin lawmthu a sawi mawlh mawlh thin thu a sawi bawk.

Meizial duh ve tak a ni tih a pawm a, mahse, thlalak puitu ten meizial pet tura an tih zel avanga meizial pet reng ang maia mi tam takin an hmu erawh a dik lo tih a sawi a, meizial zu ngai lem lo pawhin thla an lakpui dawn hian zial an peh ve thin thu leh amah pawhin a hlimpui hle thu ZALEN a hrilh.

Mahniin a awm, sik leh sa inthlak ang zelin a eizawnna pawh Rinmawii hian a thlak ve mai thin. Mautuai/Rawtuai awm hun lai chuan a khawrh a, a zuar mai a, thal a lo ni a, Thingthupui leh thal chawhmeh dang zawngin ramhnuai lamah a vakchhuak leh mai thin. Nikum lam kha chuan Ba hmun te a nei a, vawk te a vulh thin bawk. Kuminah erawh rambuai avangin a che chhuak hleithei meuh lo niin a sawi.

Rinmawii hi nula hnahkhat chu a ni bik lo a, pasal a lo nei ve tawh a, mahse, an inkarah fa erawh an piang lo. Chutihrualin nausen a nih atanga a chawilen fanu anga neih erawh a nei a, mahse, a puitlin hnu atangin an awmdun tawh lo. A hriat dan chuan tunah hian phai lamah eizawngin a awm niin a sawi.

Vairengte Kawngthar Venga khawsa mek Lalrinmawii hi nikum lam khan thih ngamin a na a, hetihlai hian Champhai lama a chhungte chuan a awmna pawh hi an hre lo a ni awm a, amah buaipuitu, a awmna huan neitu leh Pu Vanlalmuana leh Pu Pa-zawna te chhung chu Vairengte-ah hian chhungte bera a neih te an nih thu leh anni enkawlna avanga tun dinhmun thleng leh thei a nih thu a sawi, a chunga Pathian thatna chu a titi  luah tu ber a ni. 

Rinmawii hi tunhma lamah chuan lirtheia lo sumdawng tawh thin a ni a, amah hian a khalh ve mai thin niin a sawi. Thingtlang hmun thenkhata motor hlui te leiin Tiau-ah a hralh thin a, Shillong leh Silchar lam atang te pawhin motor hi a lo lachhuak bawk thin, Jeep chu a motor lakchhuah thin a nih thu ZALEN a hrilh.