Myanmar sipai ten February ni 1,2021 a mipui thlan sawrkar an paihthlak avanga tualchhung buaina kal zelah raltlan mi eng emaw zat chu Mizoramah an lut tawh a, hriattheih chinah nimin thleng khan mi 8000 chuang raltlan an awm tawh a. Mi thahnem takin Mizoram hi pan an la tum nia thudawn a ni.

ZALEN thudawn danin raltlan hi Tuipuiral huam chhungah mi 2,700 vel an awm a, Hnahthial district-ah 2,247 an awm a, Lawngtlai district-ah 3,000 chuang hret leh Lunglei district-ah 240 vel an awm a ni.

ZALEN-in Myanmar ramri depa awm mi hrang hrang a biaknaah raltlan hi an la lut zel niin an sawi a. Mizoram lama an luh chhan ber hi tun hnaiah Myanmar sipai eng emaw zatin Chin state an pan nia sawi a awm vang leh hemi kaihhnawihah hian sipai ten beihpui an thlak leh dawn nia sawi a awm vang niin an sawi. “Tun hnaiah sipai motor 50 chuangin Chin state an pan niin social media lamah thu a darh a, hei vang hian mipui an chiai a, Mizoram lam an pan ta a ni,” an ti a. Mahse sipaite hi Chin state khawpui Halkha leh Falam lam an pan lo niin an sawi.

Raltlan tam tak chu boruak a muanawm chuan anmahni khaw lamah let leh an tum niin an sawi a. Tun dinhmunah pawh ramri dep khaw thenkhat chuan Mizoram lama awm chungin an lo a buh an han seng niin an sawi a. Hmun thenkhatah chuan an riahchilh niin an sawi bawk.

Thudawn danin tun dinhmunah chuan raltlante hi mi inphalte thil pekkhawm ringin an la inchawm a. Hmun thenkhatah chuan raltlan awm rei tawh deuhte chuan inte luahin an inhlawh thin niin an sawi. Myanmar ramri dep khaw hrang hrangte chuan raltlan lo lutte hi ni sarih chhung an khung hrang (quarantine) phawt a, chumi hnuah Covid-19 an kai leh kai loh endikin hri laka fihlim te chu an chhuah thin a ni. 

Myanmar raltlante tan hian khaw tam tak chuan chenna in an sa a, khaw thenkhatah chuan school, community hall leh hmun remchangah te an khawsaktir a ni.