2018 khan Supreme Court in thuchhuah a siama – social media Group Admin te’n an group telnaa a chhung thu (content) ah chanchinbu/TV?news a Editor te ang hian ah mawh a phurhtir a, dan bawhchhiatna a awm a nih chuan IT Act & Indian Penal Code a hrem theih a ni bawk a ni.

Dan pawimawh zual a bikin naupang humhalhna dan Juvenile Justice Act leh Protection of Children against Sexual Offences Act hmanga hremna phei chu a na bik a, enkawl leh humhalh ngai leh naupang dan bawhchhia thlalak leh an nihna (identity) chu rinzawn turin engti kawng zawng mahin ziahlan emaw an thlalak tarlan khap bur a ni a. A hremna pawh na awlh awlh viau. Secular (sakhaw tihbik nei lo) ram kan nih angin social media hmangtute pawh chutiang rilru chu pu tura beisei kan ni a. Chutihrualin sawrkar ber chuan sakhaw tihbik a nei a nih vaih chuan kan ‘chanvo’ nekchepa awm mek chu kan auchhuahpui ve tur a ni ang a, tlanchhiat a chi loh zawk ang.

Chibing buaina chhuah laia inhuatna awmze neilo thehdarh te, ‘fake news’ thehdarh te, dawta mi tih hmingchhiat te tih loh tur a ni bawk.

Thlalak/video rapthlak thehdarh hi a ‘ethical’ loa mihring kan inang loa, dawnsawn dan pawh a inang lo thei khawp ang. Vantlang hriatchian chak chhiatrupna leh ‘accident’ ang te chu thehdarh awm chi a awm a, en hrehawm theh darh loh tur a ni thung a ni. Chhiatna/ dan bawhchhiatna rapthlak deuh a thlen hian video en hrehawm leh a ri hriat hrehawm a la darh fo a, hetah hian hma kan sawn a la ngai hle. Hmun danga thleng pawh nise tih ve loh a him ber.

Social media siamtute leh duangtute hian min hmangaih vanga duang ngawr ngawr an ni lo tih hi hriat tur a ni a, kan ‘data’ hmangin an la sumdawng zui ! ‘Personalized advertisement an aur a, a bikin FB phei chuan kan data/profile milin kan ‘wall’ ah an duh duh fakna an rawn dah thei tawh a ni a, an thu vet vet tawh hle. Rinaiin min hrechiang hlawm bawk si a, a tam thei ang ber min hman tir an tum a ni mai.

Social media duangtu (architect) te’n tunlaia an tum ber chu a tam thei ang ber hman tir emaw hmang lo thei loa min awm tir hi an tum ber a. Facebook hmuchhuaktu zinga mi (ex- founder President) Sean Parker chuan 2017 khan Philadelphia ah he thu hi a lo sawi chhuak tawh a. Social media chu ngawlvei min vei tir an tum ber a ni a, mihring thluaka chaklohna lai hmatheha ruahman niin sum siamna atan an hmang char char thung a ni. Social media zirbingna a awm tam tawh a, ngawlvei a hlauhawm zia hi an sawi uar hle a ni.

Social media hi a chhe hlawm tawp kan ti loa, tangkaina tam tak a nei ngei mai. Thian kawmna atan te, hriatna tihzau nan te, thil dahthatna atan te, rang taka thil inhrilhna atan te, khawtlang leh kohhran inphuar khawmna atan te, sumdawnna atan te leh thil dang tam takah a tangkai a ni. Mahse ngawlvei theih a nih avang hian a hman danah fimkhur a ngai a, bithliah insiam thiam a pawi-mawh khawp ang a, ‘engzata tam nge hun i pek phal?’ tih hi a pawimawh ber ang.

‘Zing i thawh veleh i khawih hmasak ber a ni em? 'Ka hmang tlem tawh ang?' i ti ngai em? I hman lohin i awm hle hle thei em? Hman tam luat vangin i zirlai/hna a nghawng em? tih te hi inenlet na atan lo hmang phawt teh!