Aizawl : Reserve Bank of India (RBI) chuan kum 2005 atang khan cheng sawm thir (Rs. 10 coin) a tichhuak tan a. Hun eng emaw chen cheng sawm thir hi hman a nih hnuin RBI chuan kum 2019 khan design thar an tichhuak leh a ni.

Rs. 10 thir hi state dangah chuan awlsam taka hman theih a nih laiin Mizoramah erawh sumdawng leh dawrkai thenkhatten an dawn duh loh avangin harsatna a awm a. Harsatna awm chungchangah thuneitu lamin thuchhuahte siam mah se tun thlengin chin fel erawh a la ni lo thung.

ZALEN zawhna chhangin State Bank of India (SBI) thawktute chuan Rs. 10 thir chu mipuiin an inhlauh hmuh avanga hman har mai mai nia an hriat thu an sawi a. “Mipui lam leh bank pawhin dawng ve ve tur kan ni a. Rs. 10 thir hi hman tura siam a nih avangin thleng vek hi a rem lo a, leng vel tura siam a ni,” tiin a tul a nih chuan bank-ah thleng theih reng a ni tih an sawi.

Mizoram Rural Bank manager pakhat pawhin mi thenkhatin Rs. 10 thir an dawng duh lo thin chu a chhan a hriat mai loh thu Zalen a hrilh a. “Rs 10 thir hi eng emaw zat chu kan thleng a. Kan safe-te a khah duh em avangin thleng zel a rem thin lo a, hetia bank lamin kan thleng theih loh avang hian mipui lam hian an hlau ta em ni aw ka ti deuh a ni,” a ti ve bawk.

Dawr kai pakhat chuan, “Keini chuan Rs. 10 thir hi kan dawng thin a; mahse, mi thenkhat hian an dawn ve duh tlat loh thin avangin pek chhuah leh kawngah harsatna kan tawk a. Chumai bakah bank lamah thleng a harsat thin bawk avangin kan dawng hreh ta mai a ni,” a ti ve bawk.

Pa pakhat chuan bank lamin Rs. 10 thir hi thleng an remtih thin loh avangin mipuiten an hlau ta nia a hriat thu sawiin bank hian thleng phal zel se chuan harsatna hi a kian mai a rin thu a sawi ve bawk.