India sawrkarin tangka note a siam zinga lian ber, Rs. 2,000 note chu nikum lam atang khan a vâng hle a. Rs. 2000 note a van chhan hi Reserve Bank of India (RBI)-in a siam chhunzawm loh vang leh bank pawhin an hnena lutte an pekchhuah chhunzawm loh vang a ni.

Sawrkar laipui/ RBI chuan November 8, 2016 khan Rs. 2,000 note hi a hmang (introduce) tan a. Mi tam tak tan a awlsamin rit tak taka pawisa ah ngai lovin hmun awh zau lo tê-in Rs. 2,000 hi ken theih a nih avangin mipuiin an chhawr tangkai hle a. Mahse, hetih lai vek hian mi sualten remchanga an hman ve avangin RBI chuan siam chhunzawm loh a rel ta a ni.

Police leh dan leh thupek kengkawhtute pawhin pawisa lem an man tam ber chu Rs. 2,000 note hi a ni a. Chumai bakah leklam a awlsam avangin mi sualte hian drugs-a insumdawn tawnna atan te, helho puihna atan te, chhiah awlrukna atan leh black money chi hrang hrangah an hman avangin siam chhunzawm zel hi thiltih chi-ah thuneitute chuan an ngai ta lo a ni. Mahse mi sualte hian Rs. 2,000 note lem hi an siam nasa hle a; mahse, mi sualten pawisa lem an siam hi chu a quality a chhiat avangin hriat hran a awlsam hle niin mi thiamte chuan an sawi. 

Hetia mi sualten remchanga an hman tak avang hian RBI chuan kum 2019-2020 atang khan Rs. 2,000 note chu siam chhunzawm loh a rel ta a. Bank-a lutte pawh pekchhuah an nih tawh loh avangin a vâng telh telh a. Hetih lai hian Rs. 2,000 note hi tihthih (demonetised) a ni lo thung.

Phai lam media thenkhat chuan kumtharah hian RBI chuan Rs. 1,000 siam chhuah a tum niin an sawi a, hei erawh finfiahna a awm lo thung. 

Ram changkang zawk - US, China, Germany te chuan pawisaah hian 100 note aia sang an siam lo a ni.

Hetih lai hian ram changkang lo zawk te erawh chuan pawisa note lian tak tak an siam thin thung a. India thenawm ram, Pakistan leh Sri Lanka te chuan 5000 note-te an nei hial thung.