Chief Minister Zoramthanga chuan July 1, 2022 khan Mizoram RTI Online chu a hawng a. Mizoram chu India ram state leh union territory zingah RTI Online nei thei pariatna a ni a. Mahse, he thil hmang tur hian SPIO-te chu an in-register ve phawt a ngai a, in-register an la tlem avangin RTI online hmang tangkaitu an la thahnem tawk lo hle.

RTI online-ah hian thil zawhfiah duh nei ten office pana an kal ngai kher tawh lovin an awmhmun atangin smartphone emaw, computer emaw hmangin zawhna an siam thei dawn a. RTI online hi hman ni mah se dan pangngaia dilna ‘RTI manual’ pawh kalpui chhunzawm zel a ni.

Mizoramah RTI chungchang zawh theihna tur SPIO hi 500 bawr vel an awm nia hriat niin an zinga a zatve velin registration an ti tawh a. RTI online hi sawrkarin a ngaih pawimawh avangin hemi lama mawhphurtu, GAD chuan July 20, 2022 khan notification tichhuakin DAA, SPIO leh SAPIO te chu August 12, 2022 hmaa in-register vek turin a hriattir a, tunlai hian department hrang hranga mawhphurtute chuan registration hi an ti mek.

RTI online that zawkna sawiin a sofware buaipuitu, MSeGS (Mizoram State e-Governance Society) thawktute chuan zawhna zawt duh, a bikin thingtlang lam miten hun leh tha mai bakah sum leh pai tam tak senga zawhna an zawh thin kha tibovin awmhmun atangin an thil hriat duhte an zawt thei dawn a. Zawhna bo awm lovin a thlen chin a hriat zel dawn a, chu mai bakah SPIO-in zawhna a chhan ni la lain a zawttuten an hmu nghal thei dawn a. Online-ah chuan pisa kai ni chauh ni lo, pisa chawlh niah pawh dilna hi a thehluh theih vek dawn niin an sawi.

Mizoram State e-Governance Society thawktute chuan RTI online chu a awlsam zawk avangin zawhna zawt pawh an pung nia sawiin sawrkar hnathawkte pawhin hna an ngah phah a, hei hian sawrkar langtlang leh tha a siam phah a. Hei mai bakah pawisa bo thlau a awm dawn lo niin an sawi bawk.

RTI online-ah hian phone number hmangin in-register a ngai a. Zawhna zawh man hi gpay, card, net baking etc. hmangin a pek theih a. RTI online-a dilna (application) thehlut duh, smart phone emaw internet connection nei remchang lote tan Mizoram khaw hrang hrangah Common Service Centres leh Rural Information Kiosks 800 ah te a tih theih bawk a ni.