Mizoram Excise & Narcotics department leh Mizoram Police te chuan tunhnai chho ah ruihhlo, a bikin heroin an man hnem hle a. Heng ruihhlo te hi a tlangpuiin khawchhak lam atanga lokal an ni a, Myanmar tualchhung buai vanga mi tam takin eizawnna an neih loh avangin ruihhlo tawlh hi an tam ta nia hriat a ni.

ZALEN-in Excise thawktute hnen atanga thu a dawn danin ruihhlo hi Mizoramah a luh hnem em avangin a zuarte pawhin hralhna an hre tam lo hle niin an sawi a. “Burma ram buai avangin mi tam tak Mizoramah an rawn raltlan a, eizawnna mumal an neih loh avangin ruihhlo hi rawn kengin sum tuakna atan an hmang nasa ni berin kan hria,” tiin Excise & Narcotics officer pakhat chuan a sawi. 

Heroin man pawh ni dang nena khaikhinin a tlawm hle tih sawi bawkin, “Lockdown lai leh heroin van lai kha chuan hawng khat hi Rs. 50,000/60,000 te a ni a, tunah erawh hawng khat hi Rs. 12,000 atanga 15,000 ten hmuh tur a awm tawh a. Ruihhlo rawn tawlhtute pawhin hralhna an hriat mai loh avangin thla 4/5 kawl te pawh an awm a ni,” a ti bawk.

END thawktute chuan heroin ti thar chu Aizawl khawpui ah chuan mi engemaw zat awm bawk mah se khawpui lian dangah tithar an thahnem nia an hriat thu a sawi a. Alprozolam (AP) ti chu awm bawk mah se, a tlangpuiin heroin man a tlawm avangin heroin ti hi an tam ber tih an sawi bawk.     

END chhinchhiah danin Mizoramah ruih-hlo vanga thi mi 1,703 an awm tawh a, heng zinga 1,501 hi mipa niin hmeichhia 202 an awm bawk. Kumin bikah chuan ruih-hlo hmansual vanga thi hi mi 10 an awm tawh a, an zinga pakua hi mipa niin hmeichhia pakhat a awm bawk. Ruihhlo vanga thi zingah kum 25-30 inkar an tam ber a ni.

Hetih lai hian ruihhlo chi khat Meth (Methamphetamine) ti erawh Mizo thalaite zingah an la awm lo nia an hriat thu END thawktute chuan an sawi a. Mizorama an man thin pawh Arab ram lama kaltlang tur, a kalkawng atana Mizoram an hman vanga lo man mai nia an hriat thu an sawi bawk.