Kan tui tlan a lo tlem zel avang leh kan luite then fai a tulzia hriain mi thahnemngaite an pen chhuak zel a. A hmasa atan Aizawl khaw daia luang, Chite lui humhalh nan atan hmalak niin ‘Save Chite Lui’ din a ni a. a then fai hna nasa taka thawh a ni a. A hnu deuhah Aizawl khawpui tui tlan ber, Tlawng chu humhalh leh then fai a ngai nia hriain mi thahnemngaiten ‘Save Tlawng Lui’ an din leh a. Chutiang zelin kan lui zawng zawng hi humhalha tuihna titam tur leh thian fai turin ‘Save Mizoram Rivers’ ding lehin kan luidungte humhalha chhanchhuak turin pawl an ding ve leh a, a hmingah ‘Save the Riparians’ an ti ta a ni.

Save the Riparians hi kumina din a ni a, an tum ber chu luidung humhalh, luia nungchate damkhawchhuahna siamsak leh then fai a ni. a Project an neih hmain save Tlawng project ni 16 awh neiin hetah hian Tlawng hnar atanga a tawp thleng zawh chhuakin then fai hna an thawk a, sample data lakhawmin heng an data lakkhawmte hi zirchian atan PHE department-ah an thehlut tawh.

Save Tlawng River Project hi Mizorama lui sei ber leh pawimawh em em mai, Tlawng humhalh nana buatsaih a ni a, hemi tur hian a lui hnar, Zobawk, Lunglei atanga Bairabi thleng zawh chhuaha kan tui tlan ber hi engti taka thianghlim lo nge a nih a, engin nge tibawlhhlawh a, a tui hna kangchat mek hi engtia ven a hmalak tur nge a nih tih mipuite hnena awareness pek hi an tum bulpui ber a ni tih an hruaitute chuan Zalen an hrilh a. He project-ah hian East India Campers Adventure Club, Zotrek Adventure Club leh Mission Vengthlang Adventure Club thawk hoin Management Team, Scout Team, Back Up Team leh Medical Team din a ni a, team hran hran hian an hma a tih tur tul leh awm zawng zawngte hneh takin an kalpui vek a ni.

Back up leh Medical team hian khaw kai remchang lai - Mausen, Serte, Buarpui Reiek, Lengte, Hortoki leh Bairabiah te awareness programme an nei a, a bik takin tuihna humhalh a tulzia leh plastic waste ten kan lui a tihbawlhhlawh nasatzia leh a tifai tura mipuite kan pawimawhzia tar lan leh inzirtir thin a ni a. Bomb te, tûr te leh dynamo hmanga hmun tam takah kan lui nungcha kan suat lai hmuh a nih avangin a nghawng pawizia te pawh hmun remchang lai apiangah mipui hnenah awareness pek thin a ni.

Backup Team leh Medical team hian hmun remchang lai paiangah bawlhlawhte tifaiin an hal ral thin a, hal ral theih loh chi chu garbage bagah khungin Dumping Ground-ah an paih thin.

Save the Riparians hian Tlawng fintu lui pahnih, Serlui A leh Tuirial bakah, Serluiin Tlawng a finna atanga Sairang kai thlenga thawh an tum a, ruahman dan chuan Mission veng luikawr atanga Tlawng zawhin bawlhhlawh an chharte chu motor-in SWMC, Tuirial panpui an ni.

Hei bakah hian Tuikual lui atanga Tlawng (Tuithum paltlangin) zawh tum a ni a, Tlawng (Serlui finna) atanga Sairang kaia bawlhhlawh te chhar tura ruahman a ni.

Save the Riparians-ah hian luidung humhalh duhtu apiangte a tel theih a, hmalakna hmasa atan Tlawngah bultan phawt a, hmun dangah pawh a remchan dan azira hmalak zel an tum a ni.